«Túrki ıntegratsııasynyń arhıtektory» jáne «Elbasy epopeıasy» kitaptarynyń tusaýkeseri ótti
«Túrki ıntegratsııasynyń arhıtektory» kitabynda Elbasy Nursultan Nazarbaevtyń túrki álemindegi rólin tolyqtaı ashatyn birqatar memleket basshylarynyń, tanymal saıasattanýshylardyń, ǵalymdar men zııaly qaýym ókilderiniń paıymdy pikirleri men oramdy oılary toptastyrylǵan. Al «Elbasy epopeıasy» eńbegi el táýelsizdiginiń nyshany - Qazaqstan astanasynyń 20 jyldyǵyna oraı shyǵarylyp otyr. Bul kitapqa «Egemen Qazaqstan» respýblıkalyq gazetiniń ár jyldardaǵy sanynda Nur-Sultan qalasynyń qalyptasýyn kórneki saıası jáne qoǵam qaıratkerleriniń kózimen aıshyqtaǵan jarııalanymdar engizilgen.
«Jaqsy kitap - jan azyǵy. Búgin bir emes, eki kitaptyń tusaýyn kesý úshin arnaıy jınalyp otyrmyz. Eki týyndynyń da biz úshin, keleshek urpaq úshin mańyzy erekshe. Eń aldymen, «Túrki ıntegratsııasynyń arhıtektory» kitabyna toqtalaıyn. Bul jerde QR Tuńǵysh Prezıdenti - Elbasy Nursultan Nazarbaevtyń túbi bir túrki halyqtaryn ózara jaqyndastyrýǵa yqpaly týraly mol maǵlumat bar. Elbasynyń kóshbasshylyq qasıetteri men mańyzdy qadamdarǵa barýdaǵy danalyq qyry tolyq ashylǵan. Túrki dúnıesindegi birlik pen berekeni, ózara qarym-qatynasty kózdiń qarashyǵyndaı saqtaý - bolashaq urpaq úshin óte mańyzdy. Kitap tasqa túsken tańbadaı sanaǵa jazylyp qalady. Sondyqtan, osy kitap qolyna tıgen árbir adam bizdiń tamyry tereńge jaıylǵan baýyrlastyǵymyzdy tereń túsinedi», - dedi tusaýkeserge kelgen Aqparat jáne qoǵamdyq damý mınıstri Dáýren Abaev.
Mınıstr óz sózinde «Elbasy epopeıasy» kitabynda Nur-Sultan qalasy týraly pikir-paıymdar toptastyrylǵanyn, elordany qansha nasıhattasaq ta jarasymdy ekenin atap ótti.
«Bul qos basylym ár úıdiń tórinde turatyn qundy kitapqa aınalady degen oıdamyn. Shyǵarmashylyq ujymǵa, Halyqaralyq Túrki akademııasy men «Egemen Qazaqstan» gazetine zor alǵysymdy aıtamyn. Óıtkeni, bul - qajyrly eńbektiń, úlken jumystyń oń nátıjesi», - dedi Dáýren Abaev.
Tusaýkeser barysynda kórermenderge «Túrki ıntegratsııasynyń arhıtektory» atty shaǵyn beınefılm kórsetildi.
Óz kezeginde Halyqaralyq Túrki akademııasynyń prezıdenti, «Egemen Qazaqstan» respýblıkalyq gazetiniń Basqarma tóraǵasy Darhan Qydyráli bir-birimen etene baılanysty qos kitaptyń shyǵýyna qoldaý kórsetken QR Tuńǵysh Prezıdenti - Elbasy Keńsesiniń basshysy Mahmud Qasymbekov pen Aqparat jáne qoǵamdyq damý mınıstri Dáýren Abaevqa, qurmetti avtorlarǵa, tusaýkeserge kelip iltıpatyn bildirgen QHA Tóraǵasynyń orynbasary Janseıit Túımebaevqa alǵysyn bildirdi.
«Byltyr elordamyzdyń 20 jyldyǵyna oraı el gazeti «Egemende» 280-nen astam maqala, suhbat, saraptama, estelik jaryq kórgen bolatyn. Olardyń qatarynda Elbasymen birge Astananyń qadasyn qaǵysqan, elordanyń qalyptasýyna úles qosqan tulǵalarmen birge kóptegen sheteldik memleket qaıratkerleri de boldy. Búgingi Nur-Sultannyń dastanyn jazǵan bul maqalalardy «Elorda epopeıasy» degen atpen toptastyrdyq. Al «Túrki ıntegratsııasynyń arhıtektory» dep atalatyn ekinshi kitabymyzǵa negizinen tamyrlas, baýyrlas el basshylary, kórnekti memleket qaıratkerleriniń arnaıy jazǵan maqalalary men estelikteri jınaqtaldy», - dedi Darhan Qydyráli.
