Túrki halyqtarynyń «Ortaq túrki ádebıeti» jaryqqa shyǵady
Ortaq oqýlyqty shyǵarý maqsatynda oı almasý úshin búgin Túrki keńesine múshe - Qazaqstan, Qyrǵyzstan, Ázerbaıjan jáne Túrkııa elderiniń ádebıetshi mamandary, BǴM ókilderi men Akademııanyń sarapshylary Astanada bas qosty. Jıynda sóz bastaǵan Halyqaralyq Túrki akademııasynyń (TWESCO) prezıdenti Darhan Qydyráli búgin oqýlyqtyń ózi emes, baǵdarlamasy talqylanatynyn atap ótti.
«2015 jyly osynda ótken Sammıt kezinde oqýlyqtyń kontseptsııasy qabyldandy. Oǵan úlken túrkolog ǵalymdar, ádebıet ınstıtýtynyń dırektorlary qatysqan edi. QR BǴM-de osy kontseptsııany maquldady. 2016 jyly biz Baký túrkologııalyq kongresiniń 90 jyldyǵyna oraı ótkizilgen úlken jıynda túrki áleminiń úlken ǵalymdarymen pikir almastyq. 2017 jyly osy oqýlyqtardyń baǵdarlamalaryn taraptarǵa jiberdik. Qazirge deıin Túrkııadan osyǵan baılanysty pikir kelgenimen, basqa elderden naqty usynys bildirgen joq. Usynysty osy jerde otyryp, aıtady degen úmittemiz», - degen TWESCO basshysy Túrki keńesine múshe elderdiń ókilderine sóz berdi.
Óz kezeginde Ázerbaıjannan memlekettik pedagogıkalyq ýnıversıttiń dotsenti Bilál Hasanov, Qyrǵyzstan tarapynan Halyqaralyq qyrǵyz-túrik «Manas» ýnıversıteti Shyǵys tilderi bóliminiń meńgerýshisi Osmanakýn Ibraımov, Túrkııadan Ulttyq bilim berý mınıstrligi Eýropa Odaǵy jáne syrtqy baılanystar departamentiniń dırektory Ilhan Aksoı, Qazaqstan tarapynan Y.Altynsarın atyndaǵy Ulttyq bilim akademııasy Orta bilim ınstıtýty dırektorynyń orynbasary Qaıyrjan Rahymjanov jobaǵa biraýyzdan qoldaý bildiretinderin jetkizdi.
«Ortaq túrki ádebıeti oqýlyǵyna qatysty jańalyqqa óte qýanyshtymyz. Bul bizdiń alǵa qaraı bir qadam basqanymyzdyń bir kórsetkishi. Oqýlyq baǵdarlamasynda túrki halyqtarynyń rýhanı, saıası, tarıhı birligi óte tereń kórsetilgen. Oqýlyqtyń baǵyty durys. Ortaq túrki ádebıeti negizi dástúrli ádebıetimizden bastalǵan. Aýyz ádebıeti úlgileri qoıylyp, jazba eskertkishterimiz jáne túrki halyqtarynyń ádebı-kórkem týyndylary da tanytylǵan. Ázerbaıjan Bilim mınıstrliginiń de bul oqýlyqty qoldap otyrǵanyn aıtqym keledi», - dedi Bilál Hasanov.
Jıyn barysynda Túrki keńesine múshe elderdiń barlyq ókilderi «Ortaq túrki ádebıeti» oqýlyǵyn shyǵarýdy tolyǵymen qoldaıtyndaryn jetkizdi.
