Túrki halyqtarynyń ónerpazdary elordada bir sahnada óner kórsetýde
Dástúrge aınalǵan «Astana-Arqaý» festıvali turaqty ótkizilýiniń arqasynda, ultaralyq qarym-qatynastyń jandana túsýine, sonymen qatar búkil túrki halyqtarynyń mýzykalyq mádenıetin basyn qosýda mańyzdy ról atqarýda.
Búgin san ǵasyrlar boıy atadan balaǵa, ustazdan shákirtke jetken asyl murany dástúrli mýzyka ókilderi elordanyń tórinde pash etýde.
«Astana-Arqaý» festıvali osymen 11-shi ret uıymdastyrylýda. Mádenı sharaǵa alys-jaqyn túrki tildes elderden 30-dan asa ónerpaz keldi. Festıvaldi mýzykalyq retine qaraı eki kúnge bólip ótkizýdemiz. Kórermenderdiń dástúrli án, jyrdan bólek baqsylyq saryndaǵy qoıylymdardy tamashalaý múmkindigi bar. Festıvaldiń taǵy bir ereksheligi qatysýshylar óner kórsetýmen qatar aspaptarda ózderi oınaıdy», - dedi «Astana-Arqaý» festıvaliniń mýzykalyq redaktory Músilim Ámze.
Bıylǵy «Astana-Arqaý» dástúrli túrki mýzykasy festıvali elordanyń 20 jyldyq mereıtoıy qarsańynda ótkizilip jatyr. Astana túrki órkenıeti halyqtarynyń ókilderimen keń aýqymdy kezdesýdiń bastamashysy bolyp keledi.
«Men bul festıvalge alǵash qatysyp otyrmyn. Qazaqstannyń túrki tildes ónerpazdardyń basyn qosyp, Astanada osyndaı keremet festıval uıymdastyryp jatqanyna rızamyn. Sebebi ártúrli halyqtyń ulttyq mýzykalarynyń bir sahnada oryndalýy bul sırek jaǵdaı. Onyń ústine mýzyka eshqandaı ultqa, násilge bólinbeıdi. Biz óz kezegimizde Ázerbaıjannyń halyq mýzykasyn oryndaımyz, kórermenderge unaıdy degen oıdamyz», - dedi Ázerbaıjannyń eńbek sińirgen ártisi Sahıb Pashazade.
Festıvaldiń bastapqy maqsaty - túrki mýzykasynyń áralýandylyǵy men qazirgi zamanǵy túrki etnomýzykasyndaǵy jaqyndyqty kórsetýge baǵyttalǵan. Sonymen qatar, túrki halyqtarynyń alýan túrli janrdaǵy mýzykalyq murasyn búgingi jetkizýshiler arqyly ulyqtaý.
«Búgin Saryarqanyń tórinde túrik halyqtarynyń basyn qosqan úlken merekeli festıval ótýde. Bul sharaǵa óz elderinen bólek túrki tildes elder arasynda attary tanymal ónerpazdar keldi. Maǵan unaǵany qazaqtyń ulttyq mýzykasyn barlyq qatysýshylardyń birge, bir sahnada oryndaýy. Bul ózara baýyrlastyq pen dostyqtyń belgisi. Festıvaldiń ulttyq qundylyǵy men boıaýy joǵalmasyn», - degen tilegimen bólisti qazaqtyń halyq ánshisi Ramazan Stamǵazıev.
