Túrki halyqtary áz-Naýryzdy Ankarada birge toılady

ANKARA. QazAqparat – Ankarada Kechıóren aýdany ákimdiginiń uıymdastyrýymen Qazaqstan, Aýǵanstan, Ázerbaıjan, Qyrǵyzstan, Ózbekstan, Túrikmenstan, Tájikstan jáne Pákistan elshilikteriniń qatysýymen Naýryz meıramyna oraı saltanatty shara ótti. QazAqparat bul týraly Qazaqstannyń Túrkııadaǵy Elshiligine silteme jasap habarlaıdy.

Іs-sharaǵa Kechıóren aýdanynyń ákimi Týrgýt Altynok, aýdan gýbernatory Ýǵýr Býlýt, Qazaqstannyń Túrkııadaǵy Elshisi Abzal Saparbekuly, Túrksoı Bas hatshysy Dúısen Qaseıinov, qatysýshy memleket Elshileri, aýdan maslıhaty depýtattary, qala turǵyndary, qazaq dıasporasy men stýdentteri jáne BAQ ókilderi qatysty.

Merekeniń ashylý saltanatynda sóz sóılegen Elshi A.Saparbekuly Ulystyń uly kúni – Naýryz meıramy kúlli túrki áleminiń ortaq tól merekesi ekenin basa aıtyp, tamyrly tarıhymyzdan syr shertti. Kún men túnniń teńesken kúni, jańa jyldyń bastaýy ekenin atap ótken elshi, Qazaqstan-Túrkııa yntymaqtastyǵy máńgi bolsyn dep tiledi.

Naýryz toıy barysynda jergilikti turǵyndar úshin qazaqtyń kıiz úıi tigilip, halqymyzdyń baı murasy nasıhattaldy. Qonaqtarǵa naýryz kóje taratylyp, salt-dástúrlerimizdiń tarıhy tanystyryldy.

Sondaı-aq, Túrkııada ótken «Men juldyz bolamyn» jarysynyń jeńimpazy qazaqstandyq Baljamal Nurlybekqyzy qazaqtyń ásem áýenimen jınalǵan qaýymdy tánti qaldyrdy. Sonymen qatar, Túrkııadaǵy qazaq tálimgerimiz, Ǵaınolla Almatov «Kóroǵly» jáne «Balbyraýyn» kúılerin Anadoly jurtyna pash etti.