Túrki elderiniń saýda-ónerkásip palatasy qandaı máselelermen aınalysady

NUR-SULTAN. QazAqparat - Túrki elderiniń saýda-ónerkásip palatasy mańyzdy jobalardy júzege asyrýǵa múddeli. Bul týraly «Atameken» UKP tóraǵasy Abylaı Myrzahmetov aıtty, dep habarlaıdy QazAqparat tilshisi.

«Túrki tildes eldermen bizdiń tarıhymyz, mádenıetimiz bir. Endi bul baılanysty kásipkerlik salada arttyrý mańyzdy. Túrki tildes memleketterde 152 mln-ǵa jýyq adam bar, al jyldyq JІÓ kólemi 1 trln dollardan asady. Bul úlken naryqty durys qoldana bilýimiz kerek», - dedi Abylaı Myrzahmetov elordada ótip jatqan HІІ Astana ekonomıkalyq forýmy aıasynda Túrki elderi saýda-ónerkásip palatasynyń Іskerlik keńesinde.

A. Myrzahmetovtiń aıtýynsha, Túrki elderiniń saýda-ónerkásip palatasy aýyl sharýashylyǵy, jeńil ónerkásip, azyq-túlik baǵytynda kásipkerlik jobalardy arttyrý týraly kelisimge keldi.

Qazirgi tańda eksportpen aınalysatyn qyzmetkerlerdiń kásiptik bilimin jetildirý jáne kedendik baqylaý jumystaryn talaptarǵa sáıkes júrgizilýi týraly zańnamalyq qujat ázirlenýde. Sondaı-aq, «Atameken» UKP túrkııalyq áripestermen birlesip, saýda-sattyqty jeńildetetin, kásipkerler qyzmetiniń ashyqtyǵyn qamtamasyz etetin ortaq mobıldi qosymsha qurastyrýda.

Buǵan deıin, Túrki elderiniń saýda-ónerkásip palatasyn qurý týraly qujat qabyldanǵandyǵy týraly habarlaǵan bolatynbyz.

Avtory: Á. Asqar