Túrki elderiniń kásipodaq uıymy qurylady

ShÝShA. QazAqparat - Ázerbaıjannyń mádenı astanasy Shýsha qalasynda tarıhı oqıǵa boldy – tórt túrki memleketi – Qazaqstan, Ázerbaıjan, Túrkııa jáne Ózbekstannyń Ulttyq kásipodaq ortalyqtary jańa biregeı birikken qurylym – Túrki elderiniń kásiptik odaq uıymyn qurý týraly kelisimge qol qoıdy. QazAqparat bul týraly QR Kásipodaqtar federatsııasynyń medıa ortalyǵyna silteme jasap habarlaıdy.

Kelisimge Ázerbaıjan Kásipodaqtar konfederatsııasynyń tóraǵasy Sattar Mohbalıev, Qazaqstan Respýblıkasy Kásipodaqtar federatsııasynyń tóraǵasy Satybaldy Dáýletalın, «Türk-İş» Túrik kásipodaqtary konfederatsııasynyń prezıdenti Ergıýn Atalaı, Ózbekstan Kásipodaqtar federatsııasy tóraǵasynyń orynbasary Bahtıer Mahmadalıev qol qoıdy.

Qyrǵyzstan uıymǵa baqylaýshy mártebesinde qatysady.

Jańa qurylymnyń negizgi maqsaty – eńbekkerlerdiń áleýmettik, eńbek, kásiptik, ekonomıkalyq quqyqtary men múddelerin qorǵaý jónindegi is-sharalardy biriktirý.

Sattar Mohbalıevtiń aıtýynsha, kásipodaq uıymynyń qurylýy túrki memleketteriniń birigýine berik negiz qalady.

Túrki halyqtarynyń maqsat-múddesi bir ekendigin Qazaqstan Respýblıkasy Kásipodaqtar federatsııasynyń tóraǵasy Satybaldy Dáýletalın erekshe atap ótti.

«Bizdi, baýyrlas túrki halyqtarynyń ókilderin ortaq tarıhı tamyr, ortaq mádenıet pen dástúr, ortaq maqsat pen ortaq múdde biriktiredi. Túrki elderiniń ortaq múddeleri ǵana emes, san ǵasyrlyq tarıhy da ortaq ekenin atap ótkim keledi. Sońǵy otyz jylda túrkitildes memleketterdiń yntymaqtastyǵy tabysty damyp, bul mehanızmdi úkimetaralyq uıymnan (Túrki keńesi) aımaqtyq halyqaralyq uıymǵa (TMB) deıin jetildirdi», - dedi ol.

Aldaǵy yntymaqtastyqtyń negizgi baǵyttarynyń qatarynda S.Dáýletalın aldyńǵy qatarly kásipodaq tájirıbesin ilgeriletýdi, tájirıbe almasýdy jáne jalpy túrki memleketteriniń eńbek naryǵyndaǵy jaǵdaıdy ózgertýdi atady.