Túrki elderiniń arnaıy qyzmetteri terrorızmmen birlesip kúresýge kelisti

ShOLPON-ATA. KABAR-QazAqparat - Yssyqkól oblysynyń Sholpon-Ata qalasynda Qyrǵyzstan Memlekettik ulttyq qaýipsizdik komıtetiniń (MUQK) tóraǵalyǵymen Túrki memleketteriniń arnaıy qyzmetteri konferentsııasynyń XXIV otyrysy ótti, dep habarlaıdy QazAqparat Kabar agenttigine silteme jasap.

Otyrys jumysyna Qazaqstan, Ázerbaıjan, Túrkııa, Ózbekstan jáne Qyrǵyzstan arnaıy qyzmetteriniń basshylary men ókilderi qatysty. Sondaı-aq konferentsııaǵa baqylaýshy retinde Reseı men Majarstan arnaıy qyzmetteriniń delegatsııalary keldi.

Kezdesýde Taıaý Shyǵys jáne Aýǵanstannyń terrorızm belsendiligi bar aımaqtarynda qalyptasqan jaǵdaı eskerile otyryp, túrki memleketterindegi qaýipsizdik pen turaqtylyqty qamtamasyz etý baǵytynda arnaıy qyzmetterdiń ózara is-qımylynyń ózekti máseleleri qaraldy.

Konferentsııaǵa qatysýshylar Aýǵanstan men Sırııanyń qarýly qaqtyǵys aımaǵynan keletin jáne lańkestik pen dinı ekstremızmniń taralýyna baılanysty qaýipterdi oqshaýlaý boıynsha ózara is-qımyl tetikterin qarastyrdy.

Kezdesý aıasynda Qyrǵyz Respýblıkasynyń Prezıdenti túrki memleketteriniń arnaıy qyzmetteriniń basshylarymen kezdesti. Jıynǵa qatysýshylarǵa arnaǵan sózinde Sadyr Japarov túrki memleketteriniń múddesin qozǵaıtyn syrtqy qaýip-qaterlerge qarsy turý boıynsha birlesken jumysta arnaıy qyzmetterdiń tyǵyz yntymaqtastyǵy men kúsh-jigerin biriktirýdiń mańyzdylyǵyn atap ótti.

Foto: kabar.kg