Túrki elderi shet memleketterdegi dıasporalarmen baılanysty nyǵaıtady

ANKARA. QazAqparat - Ankarada 8 qarashada  Túrkitildes elder yntymaqtastyǵy keńesine qatysýshy memleketterdiń  dıasporalar mınıstrleri men dıasporalar uıymdary jetekshileriniń úshinshi otyrysy ótedi (Túrki keńesi), dep habarlaıdy Anadoly. 

Májilis túrik úkimeti janyndaǵy shekaradan tys jerlerdegi otandastar isi jónindegi basqarmanyń úılestirýimen, sondaı-aq Túrkııa mádenıet jáne týrızm mınıstri Mehmet Nýrı Ersoıdyń tóraǵalyǵymen ótedi.

Kezdesýdegi qozǵalatyn basty másele, shet elderde tirshilik keship jatqan  Túrki keńesine qatysýshy elder azamattarynyń baılanysyn nyǵaıtý bolmaq.

Otyrysqa qatysýshylar osy baǵyttaǵy 2018-2019 jyldar aralyǵynda is-sharalar josparyn aıqyndaıdy.

Májiliske dıasporalarmen jumys jónindegi Ázerbaıjan Memlekettik komıtetiniń basshysy Fýad Mýradov, Qazaqstannyń Qoǵamdyq damý mınıstri Darhan Káletaev jáne Qyrǵyzstannyń Memlekettik mıgratsııalyq qyzmeti  tóraǵasy Bolotbek Ibraımjanov qatysady.

Eske sala ketsek, Túrki tildes elder keńesi 2009 jyly qurylǵan bolatyn.

Ázerbaıjan, Qazaqstan, Qyrǵyzstan jáne Túrkııa Túrki keńesiniń quryltaıshylary bolyp tabylady.