Túrki elderi arasynda ashylatyn telearnanyń ǵımaraty Túrkistanda bolýy tıis - Ahmet Ieshıltepe
Jıynǵa qatysqan Túrkııalyq «NTV» telearnasynyń baǵdarlama redaktory Ahmet Ieshıltepe telearnanyń ǵımaraty Túrkistanda bolýy tıis degen usynys jasady. Ol óz usynysyn kıeli shaharda túrki halyqtaryna ortaq Qoja Ahmet ıAsaýıdiń jatqandyǵymen túsindirdi, dep habarlaıdy QazAqparat HAA tilshisi.
Basqosýda sóz bolǵan keleli másele tóńireginde Túrki keńesiniń joba jetekshisi Djeıhýn Shahverdıev, «TRT-Avaz» telearnasynyń dırektory Murat Akkoch pen bas keńsesi Brıýssel qalasynda ornalasqan «EURELIZ» Medıa jáne strategııalyq kommýnıkatsııalar kompanııasynyń dırektory, jýrnalıst Elı Hadjıevalar da óz pikirlerin bildirdi. Qyrǵyzstandyq «Kabar» Ulttyq aqparat agenttigi dırektorynyń orynbasary Tynchtyk Karymshakov pen «Habar» agenttigi» tóraıymynyń orynbasary Rınat Kertaevtar da óz oılaryn ortaǵa saldy.
«Elbasymyz Nursultan Nazarbaevtyń túrki halyqtary arasynda ortaq telearna qurý týraly usynys jasaǵanyna týra eki jyl tolypty. Osy eki jyl ishinde bizdiń Aqparat jáne kommýnıkatsııa mınıstrligi ókilderiniń jáne túrki memleketteri delegattarynyń qatysýymen, kóptegen otyrystar ótti. Osy ýaqyt aralyǵynda arnaıy jumys toptary jınalyp, naqty usynystar aıtyldy. Árıne, telearna qurý búgingideı ekonomıkalyq daǵdarys kezeńinde birden júzege asatyn dúnıe emes, Biraq, deıturǵanmen memleketterdiń barlyq telearnalarynyń, buqaralyq aqparat quraldarynyń aýqymynda baılanysty damytý, derekti fılmdermen almasý, daıyn kontentti túrli memleketterdiń aqparat quraldarynda kórsetý birtindep júzege asyp jatyr»,- dedi forýmnyń moderatory Rınat Kertaev.
Túrki elderi úshin ashylatyn ortaq telearna qurý máselesi turaly usynystar eskerilip, barlyq memleketterdiń mınıstrlikterine joldanatyn boldy. Bul másele sondaı-aq «EKSPO -2017» halyqaralyq kórme aıasynda ótetin Eýrazııalyq medıaforýmda talqylanbaq.
Búgingi basqosý sońynda sondaı-aq túrkitildes memleketter arasynda aqparat almasýdyń tıimdiligin arttyrý maqsatynda buqaralyq aqparat quraldarynyń ókilderi ózara tájirıbe almasyp, aldaǵy ýaqytta tyǵyz qarym-qatynasta jumys jasasý týraly kelisimge keldi.
