«Túrki dúnıesi» - kúlli túrkitanýshylarǵa ortaq basylym
ASTANA. 21 qyrkúıek. QazAqparat - Jalpytúrkilik qundylyqtardy pash etý - Halyqaralyq Túrki akademııasynyń bir mindeti. Osy akademııa shyǵarǵan «Túrki dúnıesi» almanahy bul mindetti atqarýdaǵy bastama ǵana.
Bul týraly Halyqaralyq Túrki akademııasynyń baspasóz qyzmeti habarlaıdy.
Almanah - túrki dúnıesiniń tarıhı-mádenı asyl muralaryna qatysty ózekti máselelerdi qamtı otyryp, tyń zertteýlerdi jınaqtap, nasıhattaýǵa jáne túrkilerdiń álemdik órkenıettegi alatyn orny men mańyzyn baǵamdaýǵa arnalǵan ǵylymı-kópshilik eńbek. Jańa basylym (Túrki dúnıesi. ǵylymı-kópshilik almanahy. - Astana: «Folıant» baspasy, 2012. - 724 bet.) túrkitanýshylarǵa, jas ǵalymdarǵa, túrki halyqtarynyń tarıhı-rýhanı murasyna qyzyǵatyn jalpy oqyrmanǵa arnalyp otyr.
Mazmuny men jazylý sıpatyna qaraı jınaq jeti taraýdan turady. Olar «Qazirgi túrki memleketteri», «Túrki tulǵalary», «Dáýir tynysy», «Ǵylym kókjıegi», «Ǵulama ǵumyr», «Túrki mádenıeti, «Túrki óneri» dep aıdarlanǵan.
«Qazirgi túrki memleketteri» aıdarynda Ázirbaıjan Respýblıkasy, Qazaqstan Respýblıkasy, Túrkııa Respýblıkasy jáne Qyrǵyzstan Respýblıkasynyń tynys-tirshiligi, saıasaty, ekonomıkasy týraly aqparat beriledi.
«Túrki tulǵalary» aıdarynda atalǵan memleketterdiń uly tulǵalarynyń bolmys-bitimi men jańa tarıh betterindegi orny jaıly baıandalady.
«Dáýir tynysy» men «Túrki mádenıeti» aıdarlarynda túrkitildes elderdiń tarıhı-mádenı qundylyqtary týraly sóz bolady.
«Ǵylym kókjıeginde» otandyq, jaqyn jáne alys sheteldik belgili túrkolog ǵalymdardyń, sondaı-aq túrkologııa salasyna qalam tartyp júrgen jas býyn ókilderiniń ǵylymı maqalalary jarııalandy. Túrkilerdiń tarıhy men mádenıetiniń, tili men diliniń, ádebıeti men óneriniń, dini men fılosofııasynyń ózekti máselelerine arnalǵan, sondaı-aq ǵylymı ekspedıtsııalar nátıjelerin kórsetetin bul maqalalar túrkitaný ǵylymynyń qazirgi damý deńgeıin kórsetedi.
«Ǵulama ǵumyrda» túrki dúnıesine tanymal belgili túrkologtardyń mereıtoıyna arnalǵan maqalalar oryn alady.
«Túrki óneri» aıdarynda qazirgi zaman túrki dúnıesiniń talantty ónerpazdary jaıly aqparat jáne olardyń túrkilerdiń qaıtalanbas ózindik turmys-tirshiligin beınelegen qylqalam, sáýlet, músin, qoldanbaly óner týyndylary berildi.
«Túrki dúnıesi» almanahy alty tilde - qazaq, túrik, ázirbaıjan, qyrǵyz, orys, aǵylshyn tilderinde jaryq kórip otyr.
Alǵash ret qurastyrylyp otyrǵan túrki álemine ortaq «Túrki dúnıesi» atty halyqaralyq almanah jyl saıyn júıeli túrde shyǵarylyp otyrady.
