Túrki birligin nasıhattap júrgen ǵalymdar men tilshiler marapattaldy

TÚRKІSTAN. QazAqparat - Búgin Túrkistan qalasynda ótken «Kıeli Túrkistan jáne Túrki dúnıesiniń rýhanı jańǵyrýy» atty ǵylymı-teorııalyq konferentsııada birqatar ǵalymdar men qaıratkerler jáne BAQ ókilderi marapattaldy, dep habarlaıdy QazAqparat tilshisi.

Túrkologııa salasyna óz úlesin qosyp júrgen ǵalymdar  - Ázerbaıjandyq Ramız Askerov, Qyrǵyzstandyq Abyldajan Aqmatalıev,  professor Bahtıer Karımov, akademık Vıktor Býtanaev Vılgelm Tomsen medalimen marapattaldy. Osy salany damytýǵa  ári saıasatker retinde eńbek sińire bilgen Túrkistan oblysynyń ákimi Janseıit Túımebaevqa da  osy medal saltanatty túrde tapsyryldy. Qyrǵyzstan jazýshylar odaǵynyń tóraǵasy, Tótenshe jáne ókiletti elshisi, Qyrǵyzstannyń halyq aqyny Akbar Ryskýlovqa Halyqaralyq Túrki akademııasynyń Kúmis medali tabys etildi.  Konferentsııada Túrki tildes halyqtardyń birligin,  bilim, ǵylym, mádenıet salasyndaǵy jetistikterin nasıhattap júrgen BAQ ókilderine TWESCO-nyń  Ismaıl  Gaspyraly atyndaǵy  medıa syılyǵy tapsyryldy. 

«Baspasóz» nomınatsııasy boıynsha túrkııalyq «Ónje Vatan» gazetiniń kolýmnısti, ardager jýrnalıst Kemal Sally marapattaldy. «Telearna» nomınatsııasy «Habar» agenttigine jáne «Aqparat agenttikteri men ınternet» nomınatsııasy «Qyrǵyzstannyń «Kabar» ulttyq aqparat agenttigine berildi. 

Sonymen qatar, Túrki dúnıesine  qatysty  jańalyqtar men eleýli oqıǵalardy mass-medıada  udaıy kórsetip,  túrkitildes elderdiń aqparat salasyndaǵy baılanystaryn  nyǵaıtýǵa  úles qosyp júrgen  jýrnalıster Ázerbaıjandyq  «Tıýrkıýstan» gazetiniń bas redaktory Agıl Djamal, Týrkııalyq TRT arnasy Astana ókildiginiń jetekshisi Abdýlhamıd Avshar, «Túrkitildes jýrnalıster qorynyń» basshysy Názııa Joıamergenqyzy, «Anadolý ajansy» aqparat agenttiginiń ózbekstandyq tilshisi Baqtıor Abdıkarısmovqa TWESCO-nyń alǵys hattary tabys etildi. 

Aıta keteıik, TWESCO bıyl ıÝNESKO shtab-páterinde ótkizilgen forýmda birqatar sheshimder qabyldady. Atap aıtsaq, 2018 jyldy aqıyq aqyn Maǵjan Jumabaevtyń týǵanyna 125 jyl tolýyna oraı «Maǵjan jyly»,  uly jazýshy Shyńǵys Aıtmatovtyń  90 jyldyǵyna baılanysty «Aıtmatov jyly» jáne túrki jazýynyń alǵash oqylýynyń 125 jyldyǵyna qatysty «Túrki  jazýy jyly» dep jarııalaǵan bolatyn. Osyǵan oraı, atalǵan baǵyttarda júzege asyrylǵan jobalarǵa atsalysqan ǵalymdar men qaıratkerler Akademııa tarapynan qoldaýǵa ıe bolady.