Túrki áleminiń renessansyn bastan keshýdemiz – Shahrat Nuryshev

NUR-SULTAN. QazAqparat – «Túrki memleketteriniń bedeli men ekonomıkalyq qýatynyń artýy óńirlik aýqymda yntymaqtastyqty barǵan saıyn tartymdy etedi. «Túrkistan – túrki áleminiń rýhanı astanasy atty» halyqaralyq beınekonferentsııada Syrty ister mınıstriniń birinshi orynbasary Shahrat Nuryshev osyndaı pikir bildirdi, dep habarlaıdy QazAqparat tilshisi.

«Prezıdent Qasym-Jomart Toqaevtyń tóraǵalyǵymen ótken Túrkistan sammıtine Elbasy, Ázerbaıjan, Túrkııa, Ózbekstan, Qyrǵyzstan Prezıdentteri, Majarstan Premer-Mınıstrimen qatar Túrikmenstan Prezıdenti qurmetti qonaq retinde qatysty. Muny pandemııaǵa qaramastan, túrki áleminiń aýyzbirliginiń belgisi dep aıtýǵa bolady. Qala mádenıeti men dala mádenıeti ushtasqan Qazaq handyǵynyń astanasy, barshamyzǵa ortaq Túrkistan qalasy budan bylaı Túrki keńesi memleketteriniń basshylary qabyldaǵan Túrkistan deklaratsııasymen kúlli túrki áleminiń rýhanı astanasy retinde tarıhta qalatyny qýantady», - degen vıtse-mınıstr.

Ol Túrki keńesiniń Túrkistandaǵy beıresmı sammıti syrtqy saıasat turǵysynan birneshe ereksheliktermen halyqaralyq qaýymdastyqtyń nazaryn aýdarǵanyn atady.

«Eń aldymen, sońǵy jyldary bizdiń memleketterimiz basshylarynyń salıqaly saıasatynyń nátıjesinde túrki ıntegratsııasy jańa deńgeıge kóterilip, túrki renessansyn bastan keshirýdemiz. Jýyrda Túrkistanda ótken sammıtte kóterilgen tyń bastamalar – sonyń aıqyn dáleli. Ortaq tamyry, tarıhı, mádenı jáne ulttyq qundylyqtar bar túrki memleketteriniń ósip kele jatqan bedeli men ekonomıkalyq qýaty halyqaralyq jáne óńirlik aýqymda yntymaqtastyqty barǵan saıyn tartymdy ete túsýde», - dedi SІM ókili.

Syrtqy ister mınıstriniń birinshi orynbasary túrkitildes memleketterdiń aýmaǵynda energetıkalyq resýrstardyń bolýy jáne qolaıly geografııalyq turǵyda urymtal ornalasýy týystas elderdi jahandyq ekonomıkanyń mańyzdy quramdas bóligi retinde aıqyndap jatqanyn atady.