Túrki áleminiń «Kúlki jármeńkesi» halyqaralyq festıvali ótti
Túrkitildes memleketter arasyndaǵy saıysqa Túrkııa, Ázerbaıjan, Qyrǵyzstan, Ózbekstan, Qaraqalpaqstan, Qytaı Halyq Respýblıkalarynyń satıra sańlaqtary men Ońtústik Qazaqstan oblysynyń ázil-syqaq jáne satıra teatry, «Shanshar», «Shymkent-shoý», «Aldaraspan», «Nysana» syndy óner ujymdary qatysty. Respýblıkaǵa tanymal jazýshy-syqaqshy Muhtar Sherim de arnaıy kelip, ázilmen árlengen óner tartýyn arnady, dep habarlaıdy QazAqparat HAA tilshisi.
Baýyrlas ázilkeshter basqosýyn Túrkistan qalasynyń ákimi Álipbek Óserbaev pen OQO mádenıet basqarmasynyń bólim basshysy Ǵalııa Sharafıeva quttyqtaý sózben ashyp berdi. Túrkitildes ulttar arasyndaǵy baýyrlastyq baılanystar men dostyqty nyǵaıtýdy, túrkilik mádenıet pen ónerdi urpaqtan urpaqqa jetkizýdi, sondaı-aq satıra salasyndaǵy óner sheberleriniń bir-birimen qarym-qatynasyn damyta otyryp tájirıbe almastyrý maqsatynda uıymdastyrylǵan shara eki kúnge sozyldy. Qyzý ári tartysty ótken ázilqoılar men tapqyrlar saıysynda ár ujym halyqty kúlkige qarq qyldy. Kórermen qaýymyn shat kúlkige bólegen qaljyń dodasynda qaǵytpa sóz arqyly qatysýshylar tolǵaqty túıinderge de toqtaldy. Eldegi tynyshtyq pen beıbitshilikti, qoǵamdaǵy qaıshylyqtar men keleńsizdikterdi astarlap ázilmen jetkizdi. Ázil keshiniń sońynda sońynda jeńimpazdar anyqtalyp, "Shanshar" ázil-syqaq teatrynyń dırektory Ýálıbek Ábdiraıymov festıvalge qatysqan 11 teatr ujymyna oblys ákimdigi atynan arnaıy alǵys hat pen 350 000 teńge qarjylaı syılyqtardy tapsyrdy. Sonymen qatar, satıra salasynyń aǵa býyny, jazýshy-ysqaqshy Muhtar Sherimge oblystyq mádenıet basqarmasy atynan shapan jabylyp, Túrkistan qalasy ákimdiginiń de arnaıy syı-sııapattary tabystaldy. Festıval sońynda oblystyq satıra teatrynyń ázilkeshteri TÚRKSOI uıymy basyn qosqan Túrki elderi arasyndaǵy dostyq pen yntymaqtastyq ánderin oryndady.
Eske salaıyq, elimizde "Kúlki jármeńkesi" festıvaliniń tarıhı 1986 jyldan bastaý alsa, kúni búginge deıin shara aıasynda «Shanshar», «Shymkent-shoý», «Aldaraspan» syndy kóptegen elge tanymal teatrlarynyń tusaýy kesilgen. Bul jolǵy sharanyń quryltaıshysy - Qazaqstan Respýblıkasynyń Mádenıet jáne sport mınıstrligi. Uıymdastyrýshysy - TÚRKSOI halyqaralyq uıymy, OQO ákimdigi jáne oblystyq mádenıet basqarmasy boldy.
