Túrki áleminiń ádebıetshileri rýhanı baılanystardy nyǵaıtpaq
TÚRKІSTAN. QazAqparat - Túrkistan qalasynda Túrki álemi ádebıetiniń kitap kórmesi men aqyn-jazýshylarynyń dóńgelek ústel otyrysy ótti. Sharaǵa Ońtústik Qazaqstan oblysynyń ákimi Janseıit Túımebaev, TÚRKSOI uıymynyń Bas hatshysy Dúısen Qaseıinov, Túrkııa, Qyrǵyzstan, Túrikmenstan, Ózbekstan, Ázerbaıjan, Tatarstan, Qazaqstannyń Astana, Almaty qalalarynyń jáne óńirimizdiń kórnekti qalamgerleri qatysty, dep habarlaıdy QazAqparat HAA tilshisi.
Kıeli shaharda ótken bas qosý túbi bir túrkitildes elderdiń ózara yntymaqtastyq, dostyq qarym-qatynasyn nyǵaıtyp, baýyrlas elderdiń aqyn-jazýshylarynyń shyǵarmashylyq baılanysyn damytý maqsatynda uıymdastyryldy. Kezdesýde jazýshylar túrkitildes elderdiń, onyń ishinde qazaq ádebıetin nasıhattaý jaıy men keshegi Elbasymyzdyń «Bolashaqqa baǵdar: rýhanı jańǵyrý» maqalasy aıasynda pikir almasty.
Basqosýda TÚRKSOI uıymynyń Bas hatshysy Dúısen Qaseıinov jazýshy, Qyrǵyz Respýblıkasy mádenıetine eńbegi sińgen qaıratker Kalen Sydyqov, jazýshy, Ázirbaıjan respýblıkasynyń qalamgeri Zahıd Halılovtar shyǵarmashylyq baılanystardy nyǵaıta túsý máselesin kóterdi.
Jıynda sóz alǵan oblys ákimi Janseıit Túımebaev Memleket basshysynyń «Bolashaqqa baǵdar: rýhanı jańǵyrý» atty aıryqsha, baǵdarlamalyq maqalasynyń mańyzdylyǵyna toqtalyp, aldaǵy ortaq maqsat-mindetterdi sóz etti.
«Jalaýyn joǵary ustap, namysyn eshkimge taptatpaǵan ejelgi túrki halyqtarynyń búgingi urpaqtary bir-birimen rýhanı týystyq qarym-qatynasy árqashan da joǵary bola beredi. Sizderge túrik elderiniń salt-dástúrlerin, rýhanı mádenıetin damytý jolynda atqaryp jatqan eńbekterińiz úshin alǵysym sheksiz!», - dedi oblys ákimi.
Atalǵan shara aıasynda Túrkitildes elderdiń ádebıetin, mádenıetin nasıhattaý maqsatynda Túrkistandaǵy OQO Tarıhı mádenı etnografııalyq ortalyǵynda «Túrki álemi: ádebı -mádenı dástúr» atty túrkitildes elder qalamgerleri shyǵarmalarynyń kitap kórmesi ashyldy.
Shara sońynda oblys ákimi birqatar zııaly qaýym ókiline oblystyń 85 jyldyǵyna oraı Alǵys hat tabys etip, ıyqtaryna shapan japty. Odan bólek, jazýshy Erkinbek Turysov, Zákir Asabaev bastaǵan 10 aqyn-jazýshyǵa TÚRKSOI uıymynyń medaldary men Qurmet gramotalary tabys etildi.
