Túrki álemine tanymal ánshiler Túrkistan óńiriniń týrızmin nasıhattady
TÚRKІSTAN. QazAqparat - Túrki álemine tanymal ánshiler Túrkistan óńiriniń týrızmin nasıhattady, dep habarlaıdy QazAqparat tilshisi.
Túrkistanda «Túrkistan – Túrki áleminiń rýhanı astanasy» atty halyqaralyq týrızm dodasy realıtı-shoýynyń televızııalyq nusqasy uıymdastyryldy. Túrkistan oblysy týrızm basqarmasynyń qolǵa alýymen júzege asqan jobaǵa túrkitildes 5 memlekettiń ánshileri qatysty. Atap aıtsaq, olardyń ishinde belgili ánshi, Qyrǵyz Respýblıkasynyń eńbek sińirgen ártisi – Mırbek Atabekov, ózbekstandyq tanymal aktrısa, ánshi ári telejúrgizýshi – Sıtora Farmonova, ataqty ánshiler Amıl Mamedov (Ázirbaıjan) pen Seren Ýzýn (Túrkııa) jáne qazaqtyń ulttyq ónerin nasıhattap júrgen azamat Alekseı Lodochnıkov bar.
«Tourism kz» telearnasy uıymdastyrǵan realıtı-shoýǵa qatysýshylar Túrkistan oblysynyń mańyzdy týrıstik oryndaryn aralady. Arystan bab, Qoja Ahmet ıAsaýı kesenesi men kóne Saýran, Otyrar qalashyqtarynyń tarıhyna boılady. Sonymen birge «Kerýen saraı» kesheni men Aqmeshit úńgirin kórdi. Tikushaqpen «Saıram-Ógem» memlekettik ulttyq tabıǵı parki men «Aqsý-Jabaǵyly» memlekettik tabıǵı qoryǵyna saıahat jasady.
Bul realıtı-shoý Qazaqstan Respýblıkasynyń syrtqy jáne ishki týrızmin dáripteýge, sheteldikter úshin Túrkistan oblysynyń ulttyq tarıhı-mádenı qundylyqtaryn nasıhattaýǵa, Túrki tildes memleketter arasyndaǵy qarym-qatynastardy, mádenı baılanystardy nyǵaıtýǵa arnalǵan. Doda qatysýshylary óz jankúıerleri men tyndarmandaryna Túrkistan oblysynyń tarıhı oryndaryn tanystyrdy. Olar rýhanı astanaǵa týrısterdiń kóptep kelý bastamasyn kóterdi.
Ánshiler jobanyń qortyndysy retinde «Kerýen saraı» kesheninde jurtshylyqqa gala-kontsert berdi. Tanymal ánderin shyrqap, túrkistandyqtar men qonaqtarynyń kóńilin serpiltti. Uıymdastyrýshylar tarapynan Seren Ýzýnǵa – «Sátti qadam», Sıtora Farmonovaǵa – «Týrızm tarlany», Amıl Mamedovke – «Zııatker jıhangez», Mırbek Atabekovke – «Týrızm darabozy» jáne Alekseı Lodochnıkovke «Dostyq jarshysy» atalymdary boıynsha syılyqtar tapsyryldy.
Joǵaryda atalǵan ánshilermen birge gala-kontsertte Beıbit Kóshqalıev, Sadraddın Bolat syndy qazaqstandyq ánshiler de óner kórsetti.
Búginde Túrkistan oblysyna keletin týrıster sany artyp keledi. Naýryz merekesine arnalǵan 5 kúndik demalysta Túrkistanǵa 35 myńnan astam adam kelip, tarıhı oryndary aralaǵan.
