Túrki álemi Ulttyq ǵylym akademııalary odaǵy prezıdıýmynyń otyrysy ótti
Alqaly jıyn taıaýda ótken Túrki keńesi Memleket basshylarynyń onlaın sammıtinde aıtylǵan ǵylymı yntymaqtastyqty damytýdyń ózektiligine baılanysty usynystary men tapsyrmalary negizinde uıymdastyrylyp otyr.
Alǵash ret beınekonferentsııa túrinde ótken otyrysqa Halyqaralyq Túrki akademııasynyń prezıdenti Darhan Qydyráli, Qazaqstan Ulttyq Ǵylym akademııasynyń prezıdenti Murat Jurynov, Túrkııa Ǵylym akademııasynyń prezıdenti Mýzaffer Sheker, Qyrǵyzstan Ǵylym akademııasynyń prezıdenti Mýrat Djýmataev, Ázerbaıjan Ulttyq ǵylym akademııasynyń І vıtse-prezıdenti Isa Gabıbbeılı, Ózbekstan Ǵylym akademııasynyń vıtse-prezıdenti Bahrom Abdýhalımov, Tatarstan Ǵylym akademııasynyń prezıdenti Salahov Mıakzıým jáne Bashqurtstan Ǵylym akademııasynyń prezıdenti Gaıazov Alfıs qatysty.
Osy oraıda alqaly jıynǵa Ózbekstannyń alǵash ret uıymnyń múshesi retinde qatysyp otyrǵanyn aıta ketý kerek.
Álemdegi kúrdeli kezeńde tótenshe jaǵdaıda bas qosyp otyrǵan Odaq múshelerine Halyqaralyq Túrki akademııasynyń basshysy Darhan Qydyráli rızashylyǵyn bilidirip, kún tártibimen tanystyrdy.
Sóz basyn alǵan Ázerbaıjan Ulttyq ǵylym akademııasynyń І vıtse-prezıdenti Isa Gabıbbeılı ǵylymı jańalyqtarymen bólisip, beınekonferentsııa formatyndaǵy jıyndardy jıi ótkizip turý kerektigin aıtyp, Odaqtyń tóraǵalyǵyn Qyrǵyzstan tarapyna tapsyrdy.
Odaqtyń kezeńdik tóralyǵyn qabyldaǵan Qyrǵyzstan Ǵylym akademııasynyń prezıdenti Mýrat Djýmataev deklaratsııa jobasyn qoldaı otyryp, túrki áleminde COVID-19 indetiniń taralýy, belgileri, emdeý ádisteri jáne nátıjeleri týraly ortaq aqparat bazasyn qurýdy usyndy.
Óz kezeginde Qazaqstan Ulttyq Ǵylym akademııasynyń prezıdenti Murat Jurynov taıaýda ǵana úndeý jarııalaǵanyn jetkizip, Qazaqstannyń Ulttyq bıotehnologııalyq ortalyǵy (Nur-Sultan) men Vırýsologııa jáne mıkrobıologııa ınstıtýty (Almaty) synaqtan sátti ótken vırýsqa qarsy santızaızer – dezınfektsııalyq quraldaryn jasap shyǵarǵanyn aıtty.
Sonymen qatar, TÁUǴAO músheligine Majarstan men Tájikstandy da tartý týraly usynys bildirdi.
Odan keıin sóz alǵan Túrkııa Ǵylym akademııasynyń prezıdenti Mýzaffer Sheker pandemııaǵa qatysty arnaıy ǵylymı eseptiń daıyndalǵanyn jáne ony bólisýge daıyn ekenin jetkizdi.
Odaqqa alǵash ret uıymnyń múshesi retinde qatysyp otyrǵanyn Ózbekstan Ǵylym akademııasynyń vıtse-prezıdenti Bahrom Abdýhalımov ǵylymı yntymaqtastyqty qoldap birlese jumys isteýge ázir ekenin málimdedi.
Túrki álemi Ulttyq ǵylym akademııalary odaǵynyń basqa da basshylary paıymdy pikirlerin ortaǵa salyp, óz oılarymen bólisti. Prezıdým jıyny qorytyndysynda arnaıy sheshim qabyldandy.
