Túrki akademııasynyń basshysy qazaqstandyq BAQ ókilderimen kezdesti

NUR-SULTAN. QazAqparat - Búgin Halyqaralyq Túrki akademııasynyń prezıdenti Darhan Qydyráli jyl basy – áz-Naýryz merekesi qarsańynda Qazaqstandaǵy birqatar buqaralyq aqparat quraldarynyń basshylarmen jáne ókilderimen kezdesti, dep habarlaıdy QazAqparat akademııanyń baspasóz qyzmetine silteme jasap.

Alqaly jıynǵa Halyqaralyq Túrki akademııasynyń prezıdenti Darhan Qydyráli, «Qazaqparat» halyqaralyq aqparat agenttiginiń Basqarma tóraǵasy Asqar Omarov, «Habar agenttigi» AQ Basqarma tóraǵasynyń birinshi orynbasary Rınat Kertaev, «Balapan» telearnasynyń dırektory Maqpal Jumabaı, «Qazaq radıolary» JShS Bas dırektory Ernur Býrahan, «Elorda Aqparat» JShS dırektory Erjan Júnisov, «Qazaqstan» RTRK» AQ Aqparattyq-saraptamalyq baǵdarlamalar dırektsııasynyń dırektory Jalǵas Sádibekuly, «Túrkistan» gazetiniń bas redaktory Qýat Áýesbaı, «Qazaqstan tarıhı» portalynyń bas redaktory Altynbek Qumyrzaq, «Ádebıet» portalynyń bas redaktory Nurlan Qabdaı, sondaı-aq tanymal BAQ ókilderi qatysty.

Akademııa janyndaǵy Túrki mýzeıinde ótken kezdesý barysynda Akademııa basshysy Darhan Qydyráli uıymnyń atqaryp jatqan jumystar týraly aıtyp, bıyl qolǵa alynǵan jospardyń júzege asý barysymen tanystyrdy.

Sonymen qatar, birqatar BAQ basshylary men ókilderine Túrki áleminiń aqparat salasyna qosqan úlesi úshin arnaıy marapattar men alǵys hattar tabystaldy.

Basqosýǵa qatysýshylar baıyrǵy túrkilerdiń Ulystyń Uly kúninde tós soǵý dástúrimen tanysyp, qoldaryna bolat balǵa alyp, shoıyn tósti soǵyp atalǵan rásimdi atqarýǵa qatysty. Osydan keıin qonaqtar Naýryz kójeden dám tatyp, dastarhan basynda erkin pikirlesti.

Jıynǵa qatysýshylarǵa túrki akademııasy shyǵarǵan «Tıýrkskıı mır. Istorıko-kýltýrnyı Atlas» atty biregeı basylym tartý etildi.

Aıta ketetin másele, Halyqaralyq Túrki akademııasy 2020 jyly barlyǵy 42 atalym boıynsha ǵylymı eńbekterdi ázirlep jaryqqa shyǵarǵan. Onyń ishinde Abaıdyń 170 jyldyǵy aıasynda 9 eńbek jaryqqa shyqsa, ál-Farabıdiń 1150 jyldyǵy, sonymen qatar Tonykók eskertkishiniń 1300 jyldyǵyna arnalǵan eńbekter akademııa tarapynan jaryqqa shyqqan. Avtorlar quramy da áralýan. Olardyń arasynda sonaý Nıderland jerinen bastap, baýyrlas Túrkııa, Majarstan, Ázerbaıjan, Qyrǵyz eli bar, tipti sonaý Mońǵolııaǵa deıingi keńistiktegi bilikti ǵalymdardyń túrkitaný salasyndaǵy eńbekteri túrki akademııasynan basylyp shyǵyp jatyr. Jaryqqa shyǵyp jatqan eńbekterdiń tili de ártúrli.

«Baıyrǵy túrki babalarymyzdan ot jaǵyp, tóske balǵa uryp, Jańa kúndi qarsy alatyn dástúr qalǵan eken. Osy saltty Halyqaralyq Túrki akademııasy qaıta jańǵyrtyp, jyl saıyn mártebeli meımandardy arnaıy shaqyryp, tóske balǵa soǵýdy dástúrge aınaldyryp kele jatyr»,-delingen Halyqaralyq Túrki akademııasynyń baspasóz qyzmeti taratqan málimette.