Túrki Akademııasynyń 2019 jylǵy jumys jospary bekitildi
Jıynǵa Qyrǵyzstannyń Bilim jáne ǵylym mınıstri Gúlmıra Qudaıberdıeva, Ázerbaıjan Bilim mınıstriniń orynbasary Maxabbat Velıeva, Túrkııa Bilim mınıstriniń orynbasary Mustafa Safran, Qazaqstan Bilim jáne ǵylym vıtse-mınıstri Rústem Bıǵarı jáne Halyqaralyq Túrki akademııasynyń (TWESCO) basshysy Darhan Qydyráli qatysty.
Keńes barysynda akademııa jetekshisi 2018 jyly atqarylǵan jumystardyń esebin berip, 2019 jyldyń jumys josparymen tanystyrdy. Sondaı-aq keńes músheleri Túrki Akademııasynyń 2019 jylǵy ataýly datalaryn maquldap, bilim jáne ǵylym salasyndaǵy yntymaqtastyq máselelerin talqylady.
Keńes barysynda Halyqaralyq Túrki Akademııasy daıyndaǵan «Túrki álemi geografııasy», «Ortaq túrki tarıhy» jáne «Ortaq túrki ádebıeti» oqýlyqtaryn da jan-jaqty talqylap, qarastyrdy. Keńes músheleri atalǵan oqýlyqtarǵa ózderiniń joǵary baǵasyn berdi jáne olardy tolyqtaı daıarlaý isin 2019 jyldyń qyrkúıek aıyna deıin aıaqtaýdy tapsyrdy.
Óz kezeginde Túrkııa Bilim mınıstriniń orynbasary Mustafa Safran Túrki akademııasy ázirlegen "Ortaq túrki tarıxy" oqýlyǵyn Túrkııada 30 myńnan astam oqýshynyń tańdaýly pán retinde tańdaǵanyn jetkizdi. Jıyn qorytyndysy boıynsha Bilim jáne ǵylym mınıstri Gúlmıra Qudaıberdıeva Túrki akademııasy Ǵylymı keńesiniń kezeńdik tóraıymy bolyp saılandy.
Keńes músheleri Ǵylymı keńestiń kelesi otyrysyn Ázerbaıjanda ótkizý jóninde ýaǵdalasty jáne 2018 jyly atqarylǵan jumystarǵa joǵary baǵasyn bere kele Túrki Akademııasynyń 2019 jylǵy jumys josparyn bekitti.
2019 jylǵy Túrki áleminiń aıtýly datalary:
1. Júsip Balasaǵunnyń «Qutty bilik» shyǵarmasynyń jazylǵanyna 950 jyl
2. Altyn orda men Moǵolstannyń qurylýyna yqpal etken Talas quryltaıynyń 750 jyldyǵy
3. Aqyn Imameddın Nasımıdiń 650 jyldyǵy
4. Túrkolog, ataqty ǵalym Ishtvan Qońyr Mandokıdiń 75 jyldyǵy.
5. Túrkııadaǵy Mustafa Kemal Atatúrik bastaǵan ult-azattyq qozǵalystyń 100 jyldyǵy
6. Túrki áleminiń ıntegratsııasy úshin erekshe mańyzy bar Nahıchevan kelisiminiń 10 jyldyǵy
