Túrki akademııasyna Majarstannyń memlekettik týy tapsyryldy
Aıta keterligi, ústimizdegi jyldyń qyrkúıek aıynda Sholpan-Atada (Qyrǵyz Respýblıkasy) ótken Túrki tildes memleketterdiń yntymaqtastyq keńesiniń altynshy sammıtinde Majarstannyń Halyqaralyq Túrki akademııasyna baqylaýshy-múshe bolý mártebesi resmı túrde bekitilgen bolatyn. Mine, osyǵan baılanysty Qazaqstannyń Táýelsizdik kúni qarsańynda Halyqaralyq Túrki akademııasy Majarstannyń memlekettik týyn qabyldaý qurmetine oraı shara ótkizdi. Jıynǵa túrki tildes memleketterdiń elshileri, memleket qaıratkerleri, ǵalymdar men túrkologtar, BAQ ókilderi shaqyrylǵan.
«Biz dástúr boıynsha Halyqaralyq Túrki akademııasynyń quryltaıshy memleketteriniń eń basty merekesi - Táýelsizdik kúnin atap ótip jatyrmyz. Osyǵan baılanysty búgin Qazaqstannyń basty merekesi Táýelsizdik kúnine oraı jınalyp otyrmyz. Shyn máninde, Táýelsizdik - eń basty qundylyǵymyz. Táýelsizdik arqyly Qazaqstan álemge tanymal boldy. Osyndaı halyqaralyq uıymdar paıda boldy. Elbasynyń bastamasymen Astanada Halyqaralyq Túrki akademııasynyń qurylýy da osy Táýelsizdikpen baılanysty. Syrtqy saıasattaǵy Qazaqstannyń jemisteri, túrki álemindegi yntymaqtastyq jáne jaqynda ǵana Elbasymyzdyń Uly dalanyń jeti qyry maqalasy da bizdiń túrki memleketteriniń baılanystaryn nyǵaıta túsedi degen nıettemiz», - dedi Halyqaralyq Túrki akademııasynyń prezıdenti Darhan Qydyráli.
TWESCO basshysy óz sózinde, búgingi shara barysynda Majarstannyń týyn kóteriletinin, ýaqyty kelgende Ózbekstan men Mońǵolııanyń da týlary osy akademııada kóteriler dep senim bildirdi.
Al QR-daǵy Majarstannyń Tótenshe jáne Ókiletti elshisi Andrash Baranı qazaq tilinde sóz sóılep, Majarstannyń Túrki akademııasyna baqylaýshy-múshe bolý mártebesiniń berilýine óziniń elshilik qyzmeti tuspa-tus kelgenine qýanyshty ekenin bildirdi.
«Bul men úshin zor qurmet. Halyqaralyq Túrki akademııasynyń shtab-páteri Astanada ornalasýynyń arqasynda Majarstan jáne Qazaqstan arasyndaǵy qarym-qatynastar damyp kele jatqanyn aıta keteıin. Majarstan men Qazaqstan arasyndaǵy qarym-qatynastardyń qarqyndy damýyna baýyrlas halyqtardyń ortaq tarıhı tamyrlarynyń áserin sezýge bolady. Sol sebepti Majarstannyń memlekettik baıraǵyn Túrki akademııasynyń shtab-páterine tabystaımyz», - dedi Andrash Baranı.
Sonymen birge, saltanatty jıyn barysynda memleket qaıratkeri Myrzataı Joldasbekov pen Syrtqy ister vıtse-mınıstri Erjan Ashyqbaev sóz sóılep, Túrki akademııasynyń aldaǵy jumysyna tabys tiledi.
