Túrki akademııasyn qurýǵa baǵyttalǵan Zań qabyldandy
ASTANA. QazAqparat - Búgin Parlament Senatynyń jalpy otyrysynda «Túrki akademııasyn qurý týraly kelisimdi ratıfıkatsııalaý týraly» QR Zańy qabyldandy. Endi qujat Memleket basshysynyń qol qoıýyna joldanady.
Atalǵan kelisimge sáıkes, taraptar túrki tildes memleketterdiń yntymaqtastyq keńesiniń aıasynda halyqaralyq uıym nysanyndaǵy Túrki akademııasyn qurady. Al Túrki akademııasynyń negizgi maqsattary men mindetteri túrki tilderiniń, ádebıeti men mádenıetiniń dıahrondyq zertteýlerin saqtaýǵa, damytýǵa jáne keńinen paıdalanýǵa baǵyttalǵan túrkologııa salasyndaǵy zertteýlerdi úılestirý jáne oǵan járdemdesý bolyp tabylady. Kelisimniń sharttaryna sáıkes, oǵan qatysýshy taraptar mindetti jarnalar tóleıtin bolady. Olardyń mólsheri Túrki Syrtqy ister mınıstrleriniń keńesi qol qoıǵan jekelegen hattamada aıqyndalady. Budan bólek, halyqaralyq akademııa túrki halyqtarynyń mádenı jáne rýhanı murasyna, olardyń álemdik órkenıetti damytýǵa qosatyn úlesine zertteýler júrgizýdi, ortaq kóne mátinder men aýyzeki derekkózderdi qosa alǵanda, túrki tilderiniń búkil áleýetin paıdalanyp, barsha túrki halyqtary úshin ortaq ádebı til jasaýǵa umtylýdy, barsha túrki tilderi úshin qoldanylatyn jınaqtalǵan álipbı ázirleý máselelerin qarastyratyn bolady. Eske sala keteıik, Túrki akademııasy ǵylymı-zertteý ortalyǵy Astanada 2010 jyly Qazaqstan men Túrkııa Respýblıkalarynyń Memleket basshylarynyń qatysýymen ashyldy. 2012 jyly Bishkek qalasynda ótken túrki tildes memleketter keńesiniń ekinshi sammıtinde Túrki akademııasyn halyqaralyq uıym retinde qurý týraly kelisimge qol qoıylǵan bolatyn. Al búgingi tańda atalǵan kelisimdi Ázerbaıjan, Qyrǵyzstan men Túrkııa respýblıkalary ratıfıkatsııalaǵan.
