Túrki akademııasyn qurý týraly kelisim Senattyń jalpy otyrysynda qaralady

ASTANA. QazAqparat - Búgin Parlament Senaty Áleýmettik-mádenı damý komıtetiniń keńeıtilgen otyrysynda «Túrki akademııasyn qurý týraly Kelisimdi ratıfıkatsııalaý týraly» zań jobasy talqylandy. Soǵan oraı, komıtet músheleri zań jobasyn palatanyń jalpy otyrysyna shyǵarý týraly qaýly qabyldady.

Toqtala ketetin jaıt, Túrki akademııasy ǵylymı-zertteý ortalyǵy Astanada 2010 jyly Qazaqstan men Túrkııa Respýblıkalarynyń Memleket basshylarynyń qatysýymen ashylǵan. 2012 jyly Bishkek qalasynda ótken túrki tildes memleketter keńesiniń ekinshi sammıtinde Túrki akademııasyn halyqaralyq uıym retinde qurý týraly kelisimge qol qoıylǵan bolatyn.

Al atalǵan kelisimge sáıkes, taraptar Túrkitildes memleketteriniń yntymaqtastyq keńesiniń aıasynda halyqaralyq uıym nysanyndaǵy Túrki akademııasyn qurady. Al Túrki akademııasynyń negizgi maqsattary men mindetteri túrki tilderiniń, ádebıeti men mádenıetiniń dıahrondyq zertteýlerin saqtaýǵa, damytýǵa jáne keńinen paıdalanýǵa baǵyttalǵan túrkologııa salasyndaǵy zertteýlerdi úılestirý jáne járdemdesý bolyp tabylady. Budan bólek, halyqaralyq akademııa túrki halyqtarynyń mádenı jáne rýhanı murasyna, olardyń álemdik órkenıetti damytýǵa qosatyn úlesine zertteýler júrgizýdi, ortaq kóne mátinder men aýyzeki derekkózderdi qosa alǵanda, túrki tilderiniń búkil áleýetin paıdalanyp, barsha túrki halyqtary úshin ortaq ádebı til jasaýǵa umtylýdy, barsha túrki tilderi úshin qoldanylatyn jınaqtalǵan álipbı ázirleý máselelerin qarastyratyn bolady.

Toqtala ketetin jaıt, búgingi tańda atalǵan Kelisimdi Ázerbaıjan, Qyrǵyzstan men Túrkııa ratıfıkatsııalaǵan. Kelisimniń sharttaryna sáıkes, oǵan qatysýshy taraptar mindetti jarnalar tóleıtin bolady. Olardyń mólsheri Túrki Keńesi Syrtqy ister mınıstrleriniń keńesi qol qoıǵan jekelegen hattamada aıqyndalady.