Túrki akademııasy tanymal Reseı túrkologtarynyń eńbekterin jarııalaıdy
Ortalyq kommýnıkatsııalar qyzmetinde ótken brıfıngte Akademııanyń 2018 jylǵy qyzmetiniń negizgi baǵyttary týraly aıtyldy.
Túrki akademııasy Abaıdyń, Alash qaıratkerleriniń rýhanı ustazy bolǵan, jádıtshildik qozǵalysynyń negizin qalaýshy ǵulama Shıhabýtdın Marjanıdiń 200 jyldyǵyna oraı bıylǵy jyldy «Marjanı jyly» dep jarııalaıdy. Bul datany Akademııa ujymy tatarstandyq áriptesterimen birlesip atap ótýdi josparlap otyr.
Budan bólek, Túrki halyqtarynyń aýyz ádebıeti úlgilerin jınaqtap, ásirese qazaq folklory úshin asa qymbat qazyna qaldyrǵan zertteýshi, Reseı túrkitaný mektebiniń negizin qalaǵan kórnekti ǵalym Vasılıı Radlovtyń bıyl dúnıeden ótkenine 100 jyl tolady. Osyǵan baılanysty Akademııa 2018 jyldy «Radlov jyly» dep jarııalaıdy. Bul dataǵa baılanysty Qazaqstanda jáne Máskeýde Reseı Ǵylym akademııasynyń Shyǵystaný ınstıtýtymen birlesip alqaly sharalar ótkizý josparlandy. Sonymen birge, Akademııa Radlovtyń «Túrki halyqtary aýyz ádebıetiniń úlgileri» atty kóptomdyǵyn aldaǵy ýaqytta jańa serııamen tolyq jarııalamaq.
Brıfıngte Akademııanyń negizgi baǵyty - túrkologııa ekenin aıtqan D.Qydyráli uıymnyń irgeli jobalaryna atsalysyp, qoldaý kórsetken, birlesip kitap shyǵarýǵa yqpal etken Reseı Federatsııasynyń Túrkologtar komıtetine alǵys bildirdi.
Aıta ketý kerek, TWESCO Reseı Federatsııasynyń ǵylymı-zertteý uıymdarymen jáne ǵalymdarymen tyǵyz yntymaqtastyq ornatqan. Máskeýlik tanymal shyǵystanýshy Ámir Nájiptiń «HIV ǵasyrdaǵy túrki tilderiniń salystyrmaly-tarıhı sózdigi» atty 4 tomdyq irgeli týyndysy, Dmıtrıı Nasılov, Igor Kormýshın, Anna Dybolardyń «Drevnetıýrkskıı slovar» atty álemge áıgili eńbeginiń Akademııada jaryq kórýi sol shyǵarmashylyq yntymaqtastyqtyń aıqyn kórinisi.
