Túrki akademııasy men L.N.Gýmılev atyndaǵy Eýrazııa ulttyq ýnıversıteti ózara áriptestik jaıly memorandýmǵa qol qoıdy
ASTANA. QazAqparat - Búgin Túrki akademııasy men L.N.Gýmılev atyndaǵy Eýrazııa ulttyq ýnıversıteti ózara áriptestik jaıly memorandýmǵa qol qoıdy. Saltanatty jıynǵa Túrki akademııasynyń prezıdenti Darhan Qydyráli men EUÝ rektory Erlan Sydyqov jáne akademııa men ýnıversıtettiń ǵalymdary, akademık, professorlar quramy qatysty. Bul týraly Túrki akademııasynyń baspasóz qyzmeti habarlady.
Taraptar memorandým aıasynda ǵylymı jobalar men ǵylymı-zertteý jumystaryn birlese júrgizý, túrkologııa máseleleri boıynsha birlesken konferentsııalar, semınarlar jáne sımpozıýmdar ótkizý, túrkitaný salasy boıynsha mamandar daıarlaýda eki taraptyń professor-oqytýshylar quramy arasyndaǵy ǵylymı-ádistemelik baılanysty ornyqtyrý, túrkitaný boıynsha magıstratýra jáne doktorantýra júıesinde mamandar daıarlaýda ýnıversıtettiń aýdıtorııalyq qoryn birlese paıdalaný, sonymen qatar, túrkitaný mamandyǵy boıynsha stýdentter men magıstranttardy, doktoranttardy óndiristik jáne oqý tájirıbesi men ǵylymı taǵlymdamadan ótkizýge múmkindik jasaýǵa kelisti.
D. Qydyráli óz sózinde Túrki akademııasynyń qazirdiń ózinde kóptegen sheteldik beldi ýnıversıtettermen, ǵylymı ınstıtýttarmen tyǵyz yntymaqtastyq ornatqanyn alǵa tartty. «Búginde Qazaqstandaǵy túrkologııa mamandarynyń shoǵyry oryn tepken Eýrazııa ulttyq ýnıversıtetimen áriptestik ornatý Eýrazııa keńistiginde túrkologııa ǵylymynyń sony serpinmen damýyna negiz bolady», - dedi ol.
EUÝ rektory Erlan Sydyqov tikeleı tórt eldiń basshylarynyń bastamasymen qurylǵan Túrki akademııasynyń mańyzdylyǵyn atap ótti. «Jýyrda halyqaralyq mártebe alǵaly otyrǵan Túrki akademııasymen túrkologııa salasynda kóptegen bilikti ǵalymdary bar Eýrazııa ulttyq ýnıversıteti birigip jumys istese, búkil túrki jurty úshin paıdaly bolady», - dedi ol.
Aıta keteıik, Túrki akademııasy 18 mamyr kúni Kóne túrki jazýy kúnine arnap halyqaralyq forým ótkizbekshi. «Túrki jazýy kúnin atap ótý týraly Qazaqstannyń ıgi sheshimin Túrki Keńesi qýana quptap, túgel túrkige ortaq mereke etý jaıyn biraýyzdan qoldady», - dep atap ótti Darhan Qydyráli.
