Túrki akademııasy men «Eýrazııa jazýshylar odaǵy» Astanada memorandýmǵa qol qoıdy

ASTANA. QazAqparat - Astanada ótken «Qazirgi zamanǵy sóz energııasy» atty Eýrazııalyq ádebı forýmǵa kelgen túrkııalyq jazýshy, «Eýrazııa jazýshylar odaǵynyń» tóraǵasy ıAkýb Ómeroǵlý TWESCO-da bolyp, akademııa prezıdenti Darhan Qydyrálimen kezdesti, dep habarlaıdy QazAqparat. 

Túrki akademııasy halyqaralyq uıymynan málim etkendeı, uıym prezıdenti Darhan Qydyráli TWESCO-nyń atqarǵan jumysy men qyzmetiniń negizgi baǵyttary týraly aıtty.

Uıym basshysy túrki ıntegratsııasyn tereńdetýde ǵylymı-gýmanıtarlyq baǵyttarmen qatar, ádebı-mádenı baılanystardyń da mańyzdy ekendigine toqtaldy.

Óz kezeginde ıAkýb Ómeroǵlý túrik qalamgerleri men qazaq jazýshylary arasyndaǵy rýhanı qarym-qatynastar týraly keńinen áńgimeledi.

Sondaı-aq kezdesý barysynda TWESCO men «Eýrazııa jazýshylar odaǵy» arasynda ózara yntymaqtastyq týraly memorandýmǵa qol qoıyldy.

Taraptar ǵylymı-ádebı basylymdardyń ortaq bazasyn qalyptastyrý, avtorlyq quqyqty saqtaý máseleleriniń ózekti ekendigin atap ótti. Sonymen qatar qos uıymnyń ózara yntymaqtastyqta jumys isteýiniń artyqshylyqtary, túrki dúnıesindegi ǵylymı-ádebı basylymdardyń bedelin arttyrý týrasynda pikir almasty.