Túrki akademııasy Ázerbaıjanda úsh jylǵa josparlanǵan keshendi zertteý jumysyn bastaıdy

NUR-SULTAN. QazAqparat - TWESCO prezıdenti Darhan Qydyráli Ázerbaıjan jazýshylar odaǵynyń tóraǵasy Anar Rzaevpen kezdesti, dep habarlaıdy Halyqaralyq Túrki akademııasynyń baspasóz qyzmeti.

Darhan Qydyráli kezdesý barysynda 2020 jyly Túrki Akademııasynyń Ázerbaıjan jerinde úsh jylǵa josparlanǵan keshendi zertteý jumysyn bastaıtynyn jetkizdi. Halyqaralyq joba arheologııa, toponımıka jáne etnografııa sııaqty salalardy qamtymaq. Sondaı-aq, Akademııa jetekshisi Ázerbaıjan men Kavkaz óńirindegi túrkilik mádenıet pen órkenıetti zertteý isine erekshe den qoıý kerektigin aıta kele, Akademııa daıyndaǵan «Ortaq Túrki tarıhy» oqýlyǵynyń týys elderde orta mektep oqý baǵdarlamalaryna enip, sonyń negizinde balalarǵa dáris berile bastaǵanyn jetkizip, ortaq ádebıet pen geografııa pánderi boıynsha da jumystardyń jalǵasyp jatqanyna toqtaldy.

Óz kezeginde Ázerbaıjan jazýshylar odaǵynyń tóraǵasy Túrki akademııasymen áriptestikke erekshe mán beretinin atap ótip, halyqaralyq uıymnyń jumysyn joǵary baǵalaıtynyn málimdedi. Ol sondaı-aq týys halyqtardyń birligi jolynda ádebı baılanystardy nyǵaıtý, aqyn-jazýshylardyń áriptestigi men qarym-qatynastaryn kúsheıte túsý qajettigin aıtty. Mártebeli meıman baýyrlas elderdiń ómirinde zııaly qaýymnyń asa jaýapty mindet atqaratynyna da toqtaldy. Anar Rzaev Qazaqstannyń latyn álipbıine ótý isinen úlken úmit kútetinin jetkizip, bul bastamanyń týys halyqtardyń jaqyndasa túsýge yqpal eterine senim bildirdi.

Kezdesý qorytyndysy boıynsha Túrki Akademııasy men Ázerbaıjan jazýshylar odaǵy arasyndaǵy áriptestikti nyǵaıtý jóninde ýaǵdalastyqqa qol jetkizildi. Sondaı-aq Akademııa prezıdenti Darhan Qydyráli Anar Rzaevqa akademııa shyǵarǵan kitaptardy syıǵa tartty.