Túrki jurty tonnyń ishki baýyndaı tatý bolyp, alǵa nyq qadam jasaýda - Prezıdent
ASTANA. KAZINFORM –Qasym-Jomart Toqaev Túrki memleketteri uıymynyń 13-sammıtinde sóz sóıledi, dep habarlaıdy Aqorda.
Memleket basshysy Túrki memleketteri uıymy túrki áleminiń tutastyǵyn nyǵaıtyp kele jatqan biregeı qurylym ekenine nazar aýdardy.
– Baýyrlas elderdiń egemendigine, ulttyq múddesine qurmetpen qaraý – bizdiń myzǵymas qaǵıdatymyz. Túrki jurty tonnyń ishki baýyndaı tatý bolyp, baǵyt-baǵdarynan aýytqymaı birlesip, alǵa nyq qadam jasaýda. «Túrki ǵasyry: tilimiz de, oıymyz da, isimiz de – bir» atty búgingi basqosý taqyrybynyń mán-maǵynasy – óte tereń. Bul jıyn Birinshi Túrkologııa quryltaıynyń 100 jyldyǵymen oraılas ótip jatyr. Munyń sımvoldyq máni de erekshe. Osydan bir ǵasyr buryn baýyrlas elderdiń zııaly qaýym ókilderi rýhanı tutastyǵymyzdy nyǵaıtý úshin ortaq múdde jolynda Baký qalasynda úlken jıyn uıymdastyryp, kúsh biriktirgen bolatyn. Biz babalarymyzdyń osy amanatyna adal bolyp, túrki áleminiń aýyzbirshiligin kúsheıtý úshin jumyla áreket etip kelemiz, – dedi Memleket basshysy.
Prezıdent osy oraıda Rejep Taııp Erdoǵannyń bastamasymen Túrki memleketteri uıymy alleıasynyń ashylǵanyn erekshe atap ótti.
– Bul alleıa myzǵymas baýyrlastyǵymyzdyń sımvolyna aınalady dep senemin. Barshańyzǵa málim, qazir álemdegi geosaıası ahýal ýshyǵyp barady. Taıaý Shyǵystaǵy jaǵdaı, ásirese, Ormýz buǵazy tóńiregindegi teketires kúrdelene tústi. Munyń bári jahan elderiniń, ásirese, shekaralas túrki memleketteriniń saýda-ekonomıkalyq jáne kólik-logıstıkalyq baılanysyna keri áserin tıgizýde. Qazaqstan bir belgili, ıaǵnı hýsıt degen áskerı qozǵalystyń baýyrlas Saýd Arabııasyna qarsy negizsiz shabýyl jasaǵanyna narazylyq bildirdi. Osyndaı jónsiz áreketterdi toqtatý kerek degen málimdemelerge qosylamyz, – dedi Qasym-Jomart Toqaev.
Memleket basshysy Qazaqstannyń TMU aıasyndaǵy ekonomıkalyq yqpaldastyq aıryqsha ról atqaratynyna senim artatynyn aıtty.
– Bizdiń elimizdiń Uıymǵa múshe eldermen alys-berisi bıyl 10 mıllıard dollarǵa jýyqtady. Byltyrǵy jylmen salystyrǵanda bul kórsetkish 40 paıyzǵa artyp otyr. Osy qarqyndy saqtap qalý úshin áli de birqatar sharalardy iske asyrýymyz kerek. Eń aldymen, «Túrki áleminiń keleshegi – 2040» baǵdarlamasyn sapaly oryndaý óte mańyzdy. Osy tusta Túrki memleketteri uıymynyń 2027-2031 jyldarǵa arnalǵan strategııasyn jedel qabyldaý qajet. Biz bul qujattyń jobasynda kórsetilgen saýda, ınvestıtsııa, qarjy, óndiris, aýyl sharýashylyǵy, tsıfrlyq tehnologııa, bilim-ǵylym jáne basqa da salalardy damytýǵa qatysty sharalardy qoldaımyz. Eń bastysy, bes jylǵa arnalǵan strategııada naqty jobalar kórinis tabýy kerek. Sondyqtan Túrki ınvestıtsııalyq qorynyń múmkindikterin barynsha qoldaný qajet. Onyń áleýeti zor. Bul qarjylyq ınstıtýttyń tolyqqandy jumys isteýine barlyq jaǵdaıdy jasap bersek, jón bolar. Buǵan qosa, ekonomıkalyq yqpaldastyqty kúsheıtý úshin Túrki saýda-ónerkásip palatasynyń múmkindigin paıdalanǵan abzal. Qazaqstan bul qurylymǵa tóraǵalyq etken kezeńde birqatar sharalar ótkizip, mańyzdy qujattar ázirledi. Osy baǵyttaǵy jumysty jandandyrý maqsatymen kelesi jyly Qazaqstanda Іskerlik forýmyn ótkizýdi usynamyz. Bizdiń oıymyzsha, Uıymymyzdyń aıasyndaǵy Aqsaqaldar keńesiniń jumysy da óte mańyzdy. Osy qurylymǵa qarjylaı jáne basqa da túrli kómegimizdi kórsetýimiz qajet, – dedi Prezıdent.
Aıta keteıik, buǵan deıin Qasym-Jomart Toqaev Ankaradaǵy Prezıdent kesheniniń Kórme ortalyǵyna barǵany habarlandy.
