Túrik ýnıversıtetteri oqý merzimin úsh jylǵa qysqartýy múmkin
ASTANA.KAZINFORM - Túrkııa joǵary bilim reformasyn jarııalady. Endi oqý baǵdarlamalary eýropalyq úlgige sáıkestendiriledi, dep habarlaıdy Kazinform agenttiginiń menshikti tilshisi.
Túrkııa prezıdenti Rejep Taıyp Erdoǵan eldiń joǵary bilim berý júıesindegi ózgerister týraly habarlady. Bul týraly ol 2025-2026 oqý jylynyń ashylý saltanatynda aıtty.
Túrkııa prezıdentiniń aıtýynsha, Túrkııa joǵary bilim berý merzimin tórt jyldan úsh jylǵa deıin qysqartatyn jańa bilim úlgisin engizýge daıyndalyp jatyr.
- Bul júıe qazirdiń ózinde kóptegen Eýropa elderinde sátti júzege asyrylyp jatyr jáne túrik ýnıversıtetteriniń halyqaralyq standarttarǵa jetýine múmkindik beredi,- dedi Erdoǵan.
Erdoǵan aldaǵy ýaqytta oqý baǵdarlamalarynyń qaıta qaralyp, jeńildetiletinin atap ótti. Jobalyq, qoldanbaly jáne zertteýge negizdelgen oqytý úlgilerine erekshe nazar aýdarylady.Bul stýdentterdiń praktıkalyq daǵdylaryn damytýǵa jáne bilimdi ómirlik jaǵdaılarda qoldanýǵa kómektesedi.
Budan basqa, reformanyń kún tártibinde oqytý sapasyn arttyrýǵa, ǵylymı zertteýlerdi yntalandyrýǵa, ýnıversıtetter men óndiris arasyndaǵy baılanysty nyǵaıtýǵa baǵyttalǵan qurylymdyq ózgerister bar.
Bul reforma Túrkııanyń bilim berý júıesin jańǵyrtý jáne ony zamanaýı eńbek naryǵynyń talaptaryna beıimdeý jolyndaǵy basty qadamdarynyń biri.
Balqash polıtehnıkalyq kolledjiniń stýdentteri Túrkııa ýnıversıtetterine grantqa túse alady.