Túrki órkenıetiniń murasyn saqtaý jónindegi konventsııany tezdetip qabyldaǵan jón - Toqaev
ASTANA. KAZINFORM – Memleket basshysy mádenı-gýmanıtarlyq yqpaldastyqty odan ári damytý máselesi de áriptestiktiń mańyzdy baǵytynyń biri ekenin aıtty, dep jazady Aqorda.
– Qazaqstan túrki halyqtarynyń tarıhı murasyn zerdeleý, saqtaý jáne dáripteý isine aıryqsha kóńil bóledi. Men bıyl Túrkistanda ótken basqosýda Túrki órkenıeti ortalyǵyn jáne dala órkenıetin dáripteýge arnalǵan «Máńgilik el» ortalyǵyn qurýdy usyndym. Qazir tıisti jumystar júrgizilip jatyr. Osy oraıda, Túrki órkenıetiniń murasyn saqtaý jónindegi konventsııany tezdetip qabyldaǵan jón dep sanaımyz. Sonymen qatar elimizde «Qazaqstan tarıhy: ejelgi dáýirden búginge deıin» atty jeti tomdyq aýqymdy eńbek ázirlenip jatyr. Osy jumysqa belsene qatysqan túrki elderiniń ǵalymdaryna shynaıy alǵys bildiremiz. Akademııalyq eńbek tarıhı oqıǵalarǵa ǵylymı turǵydan keń aýqymda, shynaıy jáne ádil kózqaraspen qaraýǵa kómektesedi, – dedi ol.
Budan bólek, Qasym-Jomart Toqaev Uıymǵa qarasty qurylymdar da irgeli ister atqaryp jatqanyn atap ótti.
– Túrki akademııasynyń bastamasymen ortaq tarıhı jáne mádenı eskertkishterge arnalǵan birqatar eńbekter jaryq kórdi. Atap aıtqanda, «Túrki áleminiń kıeli geografııasy» úsh tomdyǵy, «Kóne túrki jazbalarynyń» bes tomdyq katalogi daıyndaldy. Sondaı-aq «Qazirgi túrki tilderi sózdiginiń» 25 tomdyǵy basylyp shyqty. Bul eńbekter – túrki ǵalymdary jumysynyń úlken nátıjesi. Sonymen qatar Túrki mádenıeti jáne murasy qory «Turkic Heritage» halyqaralyq tsıfrlyq platformasyn daıyndady. Bul biregeı tsıfrlyq ónim túrki halyqtarynyń tarıhyn, ádebıetin, mádenıetin tanyp-bilýge múmkindik beredi. Túrki áleminiń tarıhynda Altaıdyń alatyn orny erekshe. Bıyl Qazaqstanda «Altaı – Túrki áleminiń altyn besigi» halyqaralyq festıvali joǵary deńgeıde ótti. ISESKO uıymynyń sheshimimen kıeli Túrkistan shahary kelesi jyly Islam áleminiń mádenı astanasy atanbaq. Biz osy bastama aıasynda túrki órkenıetiniń rýhanı úndestigi men sabaqtastyǵyn saqtaýǵa yqpal etetin aýqymdy sharalar ótkizýdi josparlap otyrmyz. Atap aıtqanda, ádebıet pen til máselesine arnalǵan Qoja Ahmet ıAsaýı halyqaralyq forýmyn, sondaı-aq Túrki jáne ıslam álemi murajaı isi mamandarynyń jıynyn ótkizemiz. Ǵalymdarymyzdy osy is-sharalarǵa belsene atsalysýǵa shaqyramyz, – dedi Memleket basshysy.
Aıta keteıik, Prezıdent «Túrki memleketteri uıymy +» formatyn qoldanýdyń mańyzy zor ekenine mán berdi.
