Túrki memleketteriniń ortaq kartasy jasalady
ASTANA. KAZINFORM — Astanada Túrki memleketteri uıymyna múshe elder geografııalyq ataýlardyń biryńǵaı katalogy men ortaq kartografııalyq bazalyq kartany ázirleý jónindegi jumysty jalǵastyrýǵa kelisti. Taraptar kartografııa, geodezııa jáne geoaqparattyq tehnologııalar salasyndaǵy yntymaqtastyqty kúsheıtý týraly deklaratsııaǵa qol qoıdy. Bul týraly Jasandy ıntellekt jáne tsıfrlyq damý mınıstrligi málim etti.
Astana qalasynda Túrki memleketteri uıymyna (TMU) múshe memleketterdiń kartografııa salasyndaǵy mekeme basshylarynyń Úshinshi kezdesýi ótti. Kezdesýge TMU-ǵa múshe memleketterdiń kartografııa salasyndaǵy mekemeleriniń basshylary men ókilderi, sondaı-aq TMU Bas hatshysynyń orynbasary Nýrý Gýlıev qatysty.
Qatysýshylar óz vedomstvolarynyń atqarǵan jumystarynyń nátıjelerin tanystyryp, geodezııa, kartografııa jáne geoaqparattyq tehnologııalardy damytý máselelerin talqylady, sondaı-aq odan ári yntymaqtastyqtyń naqty baǵyttaryn aıqyndady.
— Kezdesý barysynda TMU-nyń Kartografııa jónindegi jumys tobynyń qyzmet nátıjeleri qaralyp, yntymaqtastyqty odan ári damytý, birlesken bastamalardy ázirleý jáne ózara qyzyǵýshylyq týdyratyn baǵyttar boıynsha jobalardy iske asyrý maqsatynda onyń tehnıkalyq jáne saraptamalyq deńgeılerdegi jumysyn jalǵastyrý qajettiligi rastaldy. Bul baǵyttardyń qatarynda geografııalyq ataýlardyń biryńǵaı katalogyn qurý da bar, — delingen habarlamada.
Taǵy bir mańyzdy joba — jalpy túrki kartografııalyq bazalyq kartasy. Qatysýshylar jumys toby ázirlegen jobany pysyqtap, ony kelesi otyrysqa usynýǵa kelisti. Іs júzinde bul túrki memleketteriniń aýmaqtaryn biryńǵaı aqparattyq keńistikte jańasha kórsetýge múmkindik beretin ortaq kartografııalyq negiz qurýdy kózdeıdi.
Zamanaýı tehnologııalar men tájirıbe almasý máselesine de erekshe nazar aýdaryldy. Qazaqstan jáne TMU-nyń basqa da memleketteri geodezııa, qashyqtan zondtaý, kartografııa jáne keńistiktik derekter salalarynda ózderiniń tsıfrlyq sheshimderin qoldanyp keledi. Endigi mindet — osy sheshimdermen neǵurlym belsendi almasyp, jınaqtalǵan tájirıbeni birlesken jobalardy iske asyrý úshin paıdalaný.
Kezdesýdiń mańyzdy nátıjeleriniń biri — osy baǵyttaǵy jumysty úılestirýdi kúsheıtý týraly sheshim boldy. Taraptar TMU Hatshylyǵynyń qurylymynda Kartografııa jónindegi jumys tobynyń qyzmetin úılestiretin mamandandyrylǵan bólimshe qurý múmkindigin qarastyrýdy usyndy.
Kezdesý qorytyndysy boıynsha TMU-ǵa múshe memleketterdiń kartografııa salasyndaǵy mekeme basshylarynyń Úshinshi kezdesýiniń Deklaratsııasyna qol qoıyldy. Qujatta odan ári yntymaqtastyq, tehnologııalar almasý jáne birlesken bastamalardy iske asyrý jónindegi ýaǵdalastyqtar bekitildi.
TMU-ǵa múshe memleketterdiń kartografııa salasyndaǵy mekeme basshylarynyń kelesi, Tórtinshi kezdesýi 2027 jyly Qyrǵyz Respýblıkasynda ótedi.
Aıta keteıik, buǵan deıin Qazaqstan túrki memleketteriniń jelilik medıtsınalyq ýnıversıtetin qurýdy usynǵan bolatyn.
