Túrki memleketteri uıymynyń Ortalyq bankter keńesi qurylady

ASTANA. KAZINFORM – Bul týraly búgin Bishkekte ótken Túrki memleketteri uıymynyń sammıtinde sóılegen sózinde Memleket basshysy Qasym-Jomart Toqaev málim etti.

Memleket basshysy sózinde uıymǵa múshe elder arasynda qarjy-ınvestıtsııa salasyndaǵy yntymaqtastyqty nyǵaıtý qajet ekenin aıtty.

Qasym-Jomart Toqaevtyń pikirinshe, bul baǵytta Túrki ınvestıtsııalyq qory erekshe ról atqaryp keledi. Sonymen qatar Prezıdent taraptardyń Ortalyq bankter keńesin qurý týraly bastamany biraýyzdan quptaǵanyn jetkizdi.

– Túrki álemin ekonomıkalyq turǵydan odan ári órkendetý úshin Orta dálizdiń áleýetin tolyq paıdalanǵan jón. Onyń strategııalyq máni bar. Sondyqtan tasymaldaý joldaryna qatysty birlesken kelisim jasaý qajet. Mundaı qadam turaqty damýdy qamtamasyz etedi. Uıymǵa múshe memleketter bul bastamaǵa qoldaý bildiredi dep senemin, – dedi Prezıdent.

Memleket basshysynyń pikirinshe, uıym aıasynda saýda-ekonomıka, energetıka, qarjy jáne ınvestıtsııa salalaryndaǵy baılanystar da bekı túsken.

– Túrki ınvestıtsııalyq qory óz qyzmetin tıimdi jalǵastyryp keledi. Muny túrki ıntegratsııasyn tereńdetýge baǵyttalǵan qadam dep baǵalaımyn. Búgingi sammıtke qyrǵyz baýyrlarymyz «Ekonomıkalyq ıntegratsııa, turaqty damý, tsıfrlyq bolashaq jáne qaýipsizdik» taqyrybyn usynyp otyr. Bul usynys bárimizdiń múddemizge saı keledi. Sońǵy 10 jylda uıym músheleri arasyndaǵy ekonomıkalyq baılanystar nyǵaıa tústi. Bıyl ózara saýda aınalymy 45 mıllıard dollardan asty. Osy kórsetkishti áli de ulǵaıtýǵa bolady. Oǵan múmkindigimiz jetedi, – dedi Prezıdent.

Aıta keteıik, búgin Memleket basshysy Qasym-Jomart Toqaevtyń Túrki memleketteri uıymynyń sammıtine qatysqanyn jazdyq.