Túrki memleketteri uıymynyń beıresmı sammıti Ázerbaıjanda ótedi
ASTANA. KAZINFORM — 29-30 sáýirde Ystanbul qalasynda Túrki memleketteri uıymynyń Aǵa laýazymdy tulǵalary komıtetiniń kezekti 43-shi otyrysy ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtyp berdi.
«Kezdesýde 2023 jylǵy 3 qarashada Astanada ótken uıymnyń 10-shy sammıti barysynda qol jetkizilgen ýaǵdalastyqtardyń oryndalý barysy, osy jazda Ázerbaıjanda josparlanyp otyrǵan uıymnyń beıresmı sammıti jáne 2024 jylǵy qazanda Qyrǵyzstanda josparlanyp otyrǵan uıymnyń kezekti 11-shi sammıti boıynsha daıyndyq jumystary, sondaı-aq uıym sheńberindegi yntymaqtastyqty odan ári nyǵaıtý boıynsha ózekti máseleleri qarastyrylady», — dedi Aıbek Smadııarov mınıstrliktiń aptalyq brıfınginde.
Sondaı-aq, 30 sáýirde Baký qalasynda Túrki mádenıeti jáne murasy qory keńesiniń 1-shi otyrysy ótedi. Keńes quramyna Qorǵa múshe elderdiń mádenıet mınıstrleri kiredi.
Qazaqstan delegatsııasyn Mádenıet jáne aqparat mınıstri Aıda Balaeva bastap barady.
Túrki mádenıeti jáne murasy qory 2012 jylǵy 23 tamyzda qurylǵan jáne Túrki memleketteri uıymynyń enshiles qurylymdyq bólimshesi.
Qordyń negizgi mindetteri — túrli is-sharalardy, jobalar men baǵdarlamalardy qoldaý jáne qarjylandyrý arqyly túrki mádenıeti men murasyn qorǵaý, zerdeleý jáne ilgeriletý.
Otyrysta qor qyzmeti boıynsha máseleler, sondaı-aq 2024-2025 jyldarǵa arnalǵan is-sharalar josparynyń jobasy talqylanady.