Túrki memleketteri uıymyndaǵy yntymaqtastyqty damytý mańyzdy – Serik Jumanǵarın
ASTANA. KAZINFORM – Atalǵan uıymnyń jan-jaqty áleýeti qýatty. Bul jóninde QR Premer-mınıstriniń orynbasary – Ulttyq ekonomıka mınıstri Serik Jumanǵarın málimdedi.
Ol «Túrki memleketteri uıymy elderiniń ekonomıkalyq ıntegratsııasy jáne yntymaqtastyǵy: óndiris, agroónerkásiptik keshen, logıstıka jáne tsıfrovızatsııa salalaryndaǵy jańa múmkindikter» bıznes forýmynda atalǵan taqyrypqa toqtaldy.
– Qazaqstan úshin Túrki memleketteri uıymyndaǵy yntymaqtastyqty damytý syrtqy ekonomıkalyq saıasatta negizgi baǵyttardyń biri bolyp qala beredi. Búginde bul uıymǵa múshe elder – 170 mıllıonnan astam halqy bar jáne óndiris, kólik, aýyl sharýashylyǵy áleýeti, adam kapıtaly zor úlken naryq. Jahandyq ekonomıka ózgerip, ınvestıtsııa, tehnologııa jáne logıstıkalyq dálizder úshin báseke kúsheıip bara jatqanda, ekonomıkalyq yntymaqtastyqty kúsheıtý de asa mańyzdy, – dedi ol.
Sonymen birge, Serik Jumanǵarın endi deklaratsııalardan naqty iske kóshý kerek ekenin atap ótti. Onyń aıtýynsha, ortaq jobalardy júzege asyryp, jańa óndiris oryndaryn, tehnologııalyq alıanstar qurý qajet. Odan bólek, ózara ınvestıtsııa quıý da nazardan tys qalmaýy tıis.
Aıta keteıik, buǵan deıin Túrki elderi Túrkistan sammıti aldynda ıntegratsııany kúsheıtýge nazar aýdarǵanyn jazǵanbyz.
