Túrki memleketteri uıymyna tóraǵalyq Túrkııaǵa ótti
ASTANA. KAZINFORM — Qazaqstan Prezıdenti Túrki memleketteri uıymyn ınstıtýtsıonaldyq turǵydan damytýǵa aıryqsha nazar aýdarýǵa shaqyrdy. Bul týraly Aqordanyń baspasóz qyzmeti habarlady.
– Sońǵy jyldary Uıym qyzmetiniń aıasy keńeıdi, bul qurylym 60 túrli baǵytta jumys júrgizip jatyr. Degenmen olardyń keıbiri bir-birin qaıtalaıtyny jasyryn emes. Sondyqtan ortaq iste basymdyq berilýge tıis salalardy anyqtap alýymyz kerek. Jalpy, aldymyzda turǵan mindetter men basymdyqtardy aıqyndaý qajet. Sonymen qatar Uıymymyzdyń eń joǵary deńgeıinde qol qoıylǵan sharttardyń erejelerin buzýǵa bolmaıdy dep sanaımyn. Sondaı-aq Uıym janyndaǵy Turaqty ókilder keńesin qurý mańyzdy ekenin taǵy da aıta ketken jón. Bıyl mamyr aıynda Túrkistanda ótken eń joǵary jıynda men Túrki memleketteri uıymy áskerı alıans emes, bolashaqta da bolmaýy kerek dep aıtqan edim. Bul – Qazaqstannyń ustanymy, – dedi Qasym-Jomart Toqaev.
Memleket basshysy sóz sońynda qazaqta «Bereke – birlikte, yrys – yntymaqta» degen maqal bar ekenin eske salyp, bir jeńnen qol, bir jaǵadan bas shyǵaryp, ortaq maqsat jolynda birlese áreket etý kerektigin aıtty. Sonda túbi bir túrki jurty da ósip-órkendeı beredi.
– Búgingi basqosý Uıym jumysyna jańa serpin berip, yqpaldastyǵymyzdy nyǵaıta túsedi dep senemin. Osy oraıda, Ázerbaıjan memleketi Uıymǵa byltyrdan beri tóraǵalyq etip, onyń abyroı-bedeliniń artýyna mol úles qosqanyn basa aıtqym keledi. Men Ázerbaıjan tarapyna rızashylyǵymdy bildiremin. Endi tóraǵalyq etý mindeti Túrkııaǵa júkteledi. Aldaǵy ýaqytta da Uıym aıasynda tyń bastamalar júzege asyrylady dep senemin. Sondaı-aq Kýbanychbek Omýralıev myrzaǵa tabandy qyzmeti úshin alǵys aıtamyn. Al jańa Bas hatshy Mırvohıd Azımovqa sáttilik tileımin. Alqaly jıyndy joǵary dárejede ótkizgeni úshin Túrkııa Respýblıkasynyń Prezıdentine taǵy da rızashylyǵymdy bildiremin, – dedi Qazaqstan Prezıdenti.
Sondaı-aq sammıtte Túrkııa Prezıdenti Rejep Taııp Erdoǵan, Qyrǵyzstan Prezıdenti Sadyr Japarov, Ózbekstan Prezıdenti Shavkat Mırzıeev, Túrikmenstan Prezıdenti Serdar Berdimuhamedov, Ázerbaıjan Syrtqy ister mınıstri Djeıhýn Baıramov, TMU Bas hatshysy Kýbanychbek Omýralıev sóz sóıledi.
Túrki memleketteri uıymy 13-shi sammıtiniń qorytyndysy boıynsha Ankara deklaratsııasy qabyldandy.
Aıta ketelik Prezıdent túrki jurty tonnyń ishki baýyndaı tatý bolyp, alǵa nyq qadam jasap otyrǵanyn aıtqan edi.
