Túrki memleketteri uıymyna múshe elderdiń basshylaryna GovTesh tsıfrlyq sheshimderi tanystyryldy
ASTANA. KAZINFORM — Túrkistanda ótken Túrki memleketteri uıymynyń beıresmı sammıtine qatysýshy elderdiń prezıdentterine Qazaqstannyń tsıfrlyq ekonomıkasyn damytý jáne aımaqtaǵy tehnologııalyq seriktestikti nyǵaıtý bastamalary jaıynda málimet berildi. Bul týraly Aqorda málim etti.
Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev mártebeli meımandarǵa elimiz JI-di strategııalyq basymdyq retinde qarastyratynyn baıandady. Bul oraıda ınfraqurylymdy, adamı kapıtaldy jáne ınnovatsııalyq ónimderdi damytý arqyly tolyq ekojúıe qurylmaq.
Búginde Qazaqstanda Starlink jáne OneWeb kompanııalarynyń jerseriktik baılanys tehnologııalary belsendi túrde engizilýde. Transkaspıı talshyqty-optıkalyq baılanys jelisin tartý eldiń tranzıttik áleýetin jańa deńgeıge kóteredi.
Esepteýish qýatyn arttyrý bul saladaǵy mańyzdy qadamǵa aınaldy. Aımaqtaǵy eń iri sýperkompıýterler iske qosyldy. Endi «Derekterdi óńdeý ortalyqtarynyń alqaby» atty aýqymdy joba qolǵa alynbaq. Qýattylyǵy 1 GVt-tan asatyn hab AI-esepteýlerdi usynýǵa negizdelgen ekonomıkanyń jańa eksporttyq modeliniń irgesin qalaıdy.
Túrki memleketteri uıymyna múshe elderdiń yntymaqtastyǵy ǵarysh salasynda da nátıje berýde. Elimiz Ózbekstan, Túrkııa jáne Ázerbaıjan memleketterimen birlesip, CubeSat ǵylymı jerserigin ázirlep jatyr. Ony ǵaryshqa kelesi jyly ushyrý josparlanǵan.
Jasandy ıntellekt memlekettik basqarý júıesinde keńinen qoldanylýda. eGov AI assıtenti, AlemGPT platformasy sekildi sheshimder memlekettik qyzmetterdi anaǵurlym jetildire túsedi.
Qazaqstanda mektepter men TUMO ortalyqtarynan bastap, arnaýly AI Research ýnıversıtetterde jalǵasatyn úzdiksiz bilim berý júıesi qalyptasyp keledi.
Alem.ai halyqaralyq jasandy ıntellekt ortalyǵy mamandar men startaptar toǵysatyn orynǵa aınala alady. Onda zertteý jumystarynan jańa ónimdi qoldanysqa engizýge deıingi tolyq tsıkl júzege asyrylady.
Prezıdentterge kólik-logıstıka keshenin tsıfrlandyrý jumystary tanystyryldy. Salaǵa jasandy ıntellektini engizý úderisterdi jeńildetýge, kedergilerdi azaıtýǵa jáne óńirdiń tranzıttik áleýetin nyǵaıtýǵa jol ashady.
Buǵan deıin Qazaqstan Tsıfrlyq sheshimderdiń Azııa-Tynyq muhıty óńirlik ortalyǵyn qurý jóninde bastama kótergeni belgili. TMU-ǵa múshe elder bul usynysqa qoldaý bildirdi. Sonyń nátıjesinde Bangkok qalasynda ótken BUU-nyń Azııa men Tynyq muhıty aımaǵyna arnalǵan Ekonomıkalyq jáne áleýmettik komıssııasynyń 82-sessııasynda ortalyqty Almaty qalasynda ashý týraly qarar qabyldandy. Qazaqstan tarapy óz bastamasyn qýattaǵany úshin seriktesterine alǵys aıtty.
Aıta keteıik, Túrkistanda Túrki órkenıeti ortalyǵy boı kóteredi. Búgin Túrki memleketteri uıymyna múshe elder basshylary jańa ortalyqtyń qazyǵyn qaǵyp, irgetasyn qalady.
