Túrki memleketteri uıymyna múshe elderdiń basshylary Ankarada Túrki álemi alleıasyn ashty
ASTANA. KAZINFORM — Qasym-Jomart Toqaev Túrki memleketteri uıymyna múshe elderdiń basshylarymen birge astanalyq «Beshtepe» saıabaǵyndaǵy Túrki álemi alleıasyn ashty. Bul týraly Aqordanyń baspasóz qyzmeti habarlady.
Atalǵan alańda Túrkııa, Ázerbaıjan, Qazaqstan, Qyrǵyzstan, Ózbekstan jáne Túrikmenstan elderiniń ulttyq pavılondary ornalasqan.
Ekspozıtsııalarda baýyrlas halyqtardyń yntymaq-birligi men san alýan mádenıeti, baı rýhanı dástúri kórinis tapqan.
Qazaq kıiz úıi Uly dala rýhy men túrki dúnıesiniń ortaq tarıhı tamyryn beıneleıdi. Prezıdentterge kıiz úıdiń bezendirilýine arqaý bolǵan ejelgi túrki órkenıeti, sonyń ishinde saqtar murasy, halqymyzdyń tabıǵatpen úılesimdi ómir salty jáne zamanaýı Qazaqstannyń kelbeti jaıynda málimet berildi.
Memleketter basshylarynyń nazaryna qazaq halqynyń dástúrli saıatshylyq ónerin pash etetin «Saq ańshysy» músindik kompozıtsııasy usynyldy.
Sondaı-aq mártebeli meımandarǵa kóne túrki jazba mádenıetinen mol maǵlumat beretin Orhon eskertkishteri kórsetildi.
Qasym-Jomart Toqaev TMU-ǵa múshe elder basshylarymen birge Túrki álemi alleıasyna aǵash egý rásimine qatysty.
Aıta ketelik Toqaev Túrki memleketteri uıymynyń 13-sammıtine qatysý úshin «Kýlıe» saraıyna barǵan edi.
