Túrki memleketteri uıymyna múshe elderde ońaılatylǵan keden dálizi bolady

ASTANA. KAZINFORM – Búgin Májilistiń jalpy otyrysynda «Túrki memleketteri uıymyna múshe memleketterdiń úkimetteri arasyndaǵy ońaılatylǵan keden dálizin qurý týraly kelisimdi ratıfıkatsııalaý týraly» Zańy qabyldandy.

Atalǵan kelisimge Samarqanda 2022 jylǵy 11 qarashada qol qoıyldy.

Qaralyp otyrǵan Kelisimniń negizgi maqsaty - ońaılatylǵan keden dálizin damytýdy qamtamasyz etý arqyly Túrki memleketteri uıymyna múshe elder arasynda ótkiziletin taýarlar men kólik quraldaryn kedendik baqylaýdyń tıimdiligin arttyrý. Qujat aıasynda «ońaılatylǵan keden dálizi» jáne «saýda operatorlary» sekildi uǵymdar engiziledi.

Májilistiń Qarjy jáne bıýdjet komıtetiniń málimetinshe, ońaılatylǵan keden dálizi (OKD) – atalǵan memleketter arasyndaǵy saýdada tasymaldanatyn taýarlar týraly aldyn ala aqparat almasýǵa baǵyttalǵan, erikti negizde paıdalaný úshin ashyq jáne kóliktiń barlyq túrinde paıdalanýǵa bolatyn elektrondyq júıe. Saýda operatorlary – ońaılatylǵan keden dálizine qatysatyn, taýarlar men kólik quraldary týraly anyq aqparat beretin jáne Kelisimniń erejelerine sáıkes kedendik rásimderdi aıaqtaıtyn ókilder.

Atap aıtqanda, taraptar ózderiniń keden organdaryna Kelisimdi júzege asyrýǵa ýákilettik beredi. Aqparat almasý ońaılatylǵan keden dálizin paıdalanatyn saýda operatorlary júzege asyratyn júkter boıynsha jáne erikti negizde júrgiziledi.

Saýda operatorlaryna OKD aıasynda:

- ótkizý pýnktterinde kedendik resimdeýdiń basym tártibi;

- taraptar memleketteriniń keden zańnamasyn buzý táýekeli anyqtalǵan jaǵdaılardy qospaǵanda, ótkizý pýnktterinde kedendik jete tekserýdi qoldanbaý sekildi jeńildikter beriledi.

Memleketterdiń keden organdary Kelisim kúshine engennen keıin uzaqtyǵy 6 aı bolatyn pılottyq jobany uıymdastyrady jáne júzege asyrady.