Túrki memleketteri uıymy Azamattyq qorǵaý tetigin qurady – Májilis
ASTANA. KAZINFORM – Májilis depýtaty, Ekologııa máseleleri jáne tabıǵat paıdalaný komıtetiniń tóraǵasy Edil Jańbyrshın jańa ratıfıkatsııalanatyn zań jobalarynyń qorytyndylaryn oqydy.
Olardyń qatarynda TMU Azamattyq qorǵaý tetigin qurý týraly kelisim, Qazaqstan men Qytaı arasyndaǵy jańartylatyn energııa kózderi jobalaryn iske asyrý kelisimi, TMD-ǵa qatysýshy memleketterdiń radıatsııalyq jaǵdaı monıtorınginiń derekterimen almasý kezindegi ózara is-qımyly týraly kelisim bar.
Jalpy otyrysta «Túrki memleketteri uıymynyń Azamattyq qorǵaý tetigin qurý týraly kelisimdi ratıfıkatsııalaý týraly» zań jobasyna qorytyndy qabyldandy.
– Bul kelisim uıymǵa múshe memleketter men baıqaýshy elderdiń, sondaı-aq basqa da memleketter aýmaǵynda týyndaýy múmkin zilzalalar men tótenshe jaǵdaılarǵa den qoıýdyń birlesken tetigin qurýdy kózdeıdi. Qujatta kózdelgen sharalardy iske asyrý respýblıkalyq bıýdljetten shyǵystardy qajet etedi, – dedi E.Jańbyrshın.
Sonymen birge, «TMD-ǵa qatysýshy memleketterdiń radıatsııalyq jaǵdaı monıtorınginiń derekterimen almasý kezindegi ózara is-qımyly týraly kelisimdi ratıfıkatsııalaý» zań jobasyna qorytyndy oqyldy.
– Qaralyp otyrǵan kelisimniń negizi maqsaty – TMD-ǵa múshe elder aýmaǵynda radıaktıvti zattardyń transshekaralyq tasymaldaný qaýpi nemese týyndaýy kezindegi radıatsııalyq jaǵdaı monıtorınginiń derekterimen almasýdy qamtamasyz etý. Osy kelisim atom energııasyn paıdalaný obektileriniń, ónerkásip alańdarynan alynatyn radıatsııalyq jaǵdaı monıtorınginiń derekterine qoldanylmaıdy, – dedi E.Jańbyrshın.
Úshinshi qorytyndy - Qazaqstan men Qytaı úkimetteri arasyndaǵy jańartylatyn energııa kózderi salasyndaǵy jobalardy iske asyrý týraly kelisimge qatysty. 2023 jylǵy 17-19 mamyr kúnderi Memleket basshysy Qasym-Jomart Toqaevtyń Qytaıǵa memlekettik sapary jáne І Ortalyq Azııa – Qytaı sammıti aıasynda Qazaqstan men Qytaı úkimetteri jańartylatyn energııa kózderi boıynsha kelisimge qol qoıǵan edi. Kelisimniń maqsaty – energetıkalyq qaýipsizdikti qamtamasyz etý, jańartylatyn energııa jobalaryn damytý, taza tehnologııalarǵa kóshý jáne shyǵaryndylardy azaıtý arqyly klımattyq yntymaqtastyqty nyǵaıtý.
– Kelisim sheńberinde jalpy qýaty 1,8 gıgavatt 3 jel jáne 1 kún elektr stantsııasy salynady. 100 turaqty jáne 1500 ýaqytsha jumys orny ashylady. Shamamen 2 mlrd AQSh dollary ınvestıtsııasy tartylady. Qosymsha 5,7 mlrd kv/saǵat jasyl energııa óndiriledi, – dedi Májilis depýtaty.
Aıta keteıik, Májilis arhıv qyzmetkerleriniń áleýmettik jaǵdaıyn jaqsartatyn zań jobasyn qarap jatyr.
Májilis depýtaty, Ekologııa máseleleri jáne tabıǵat paıdalaný komıtetiniń tóraǵasy Edil Jańbyrshın jańa ratıfıkatsııalanatyn zań jobalarynyń qorytyndylaryn oqydy.