Túrki memleketteri ózara taýar aınalymyn arttyrý múmkindigin zerdelep jatyr
TAShKENT. KAZINFORM — Ózbekstan astanasynda Túrki memleketteri uıymyna (TMU) múshe elder taldaý ortalyqtarynyń halyqaralyq konferentsııasy ótti, dep habarlaıdy Kazinform agenttiginiń menshikti tilshisi.
Іs-sharaǵa Qazaqstan, Túrkııa, Ázerbaıjan, Qyrǵyzstan jáne Majarstannan kelgen delegattar qatysty. Olar óńirlik yntymaqtastyq máselelerin talqylady. Atap aıtqanda, saýda-ekonomıkalyq baılanystardy nyǵaıtý úshin qolda bar áleýetti tolyq paıdalaný múmkindikterin zerdeledi.
Konferentsııada málim bolǵandaı, byltyr TMU-ǵa múshe elderdiń syrtqy taýar aınalymy 850 mlrd dollarǵa jetti, onyń ishinde atalǵan kólemniń 7% uıym memleketteriniń úlesinde. Sarapshylar bul mejemen shektelip qalmaý kerektigin atap ótti. Ol úshin Túrki elderi kólik-logıstıkalyq kedergilerdi joıyp, ınfraqurylymdy damytyp, saýda salasyna tsıfrlyq tehnologııalardy engizýi tıis.
— Taldaý ortalyqtary arasyndaǵy ózara is-qımyl tájirıbesi yntymaqtastyq baǵyttaryn anyqtaýǵa múmkindik beredi. Tıisinshe, uıym sheńberinde áriptestikti damytý jańa ekonomıkalyq bastamalardy iske asyrýǵa negiz bolady, — dedi Ózbekstannyń Ekonomıkalyq zertteýler jáne reformalar ortalyǵynyń dırektory Obıd Hakımov.
Konferentsııa qorytyndysy boıynsha Túrki memleketteri uıymyna múshe elderdiń taldaý ortalyqtary arasynda ózara yntymaqtastyq týraly memorandýmǵa qol qoıyldy. Tıisti qujat ıntegratsııany tereńdetýge jáne ózara saýdany arttyrýǵa múmkindik beretin birlesken bastamalardy zerdeleýge múmkindik beredi.
Eske salaıyq, bıyl Ózbekstan TMU-ǵa múshe eldermen birlesip ǵaryshǵa spýtnık ushyrmaq.
Buǵan qosa, byltyr TMU-ǵa múshe elderdiń ókilderi Tashkentte bas qosyp, logıstıkalyq jobalardy birlese damytatyn alıans qurdy.