Túrki memleketteri ortaq álipbı arqyly birlikke umtylady — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Shyńjań halyq óneri maýsymynyń úzdik baǵdarlamasy Úrimjide qoıyldy — Halyq gazeti
22 qazanda Úrimji halyq saıabaǵynyń Shaıbaq aýdanynda birinshi Qytaı Shyńjań halyq óneri festıvaliniń kórnekti spektaklderiniń týry ótti, dep habarlaıdy Halyq gazeti basylymy.
Qytaılyq BAQ-tyń keltirgen deregine súıensek, is-shara Úrimjidegi saıabaqtar, kórikti jerler men saýda aýdandary sııaqty adam kóp shoǵyrlanatyn jerlerde tórt kún qatarynan ótedi.
Aıta keteıik, fotosýrette bıshilerdiń halyq bılerin oryndap, turǵyndar aralasynda bılep júrgeni beınelengen.
Sonymen qatar, osy aptada Halyq gazetinde «Qorǵas portynyń ımport pen eksport kólemi alǵashqy úsh toqsanda 34,881 mln tonnaǵa jetti» degen taqyryptaǵy aqparat jaryq kórgen bolatyn.
Qorǵas kedeniniń statıstıkasyna sáıkes, Qorǵas portynyń ımport pen eksport kólem bıyl qańtar-qyrkúıek aılary aralyǵynda 34,881 mıllıon tonnany qurap, ótken jyldyń sáıkes kezeńimen salystyrǵanda 1,8%-ǵa artty. Bul kórsetkish Shyńjańdaǵy barlyq keden beketiniń arasynda birinshi oryn alady.
Aıta keteıik, osy jyldan bastap Qorǵas porty Qytaı, Ortalyq Azııa jáne Eýropa arasyndaǵy ekonomıkalyq jáne saýda almasýlarynyń mańyzdy toraby retinde júkterdiń ımporty men eksporty kóleminiń ósý tendentsııasyn kórsetken.
Shymkentte alǵash ret aýǵan taýarlarynyń kórmesi ótedi — Eurasia Today
2025 jyldyń 26 qazanynda saǵat 15:30–da Shymkent qalasynyń Kórme ortalyǵynda aýǵan taýarlarynyń kórmesi ashylady.
Bul týraly osy aptada Qyrǵyzstanda shyǵatyn Eurasia Today aqparat agenttigi habarlady.
Atalǵan BAQ-tyń dereginshe, Aýǵanstan sheberleriniń tól ónimderi usynylatyn kórme Shymkent qalasynda alǵash ret ótedi. Aýǵan taýarlarynyń kórmesi osymen Qazaqstanda úshinshi jyl qatarynan uıymdastyrylyp keledi. Munyń aldynda 2023 jyly 3-5 tamyz aralyǵynda Astanada, 2024 jyldyń 20-22 qazan aralyǵynda Almaty qalasynda ótken bolatyn.
Kórmeniń basty maqtanyshy — álemniń ár buryshynda úlken suranysqa ıe ataqty aýǵan qolóner kilemderi.
Sonymen qatar kelýshilerge qurylys materıaldary, turmystyq jáne óndiristik hımııa, kókónister men jemister, kondıterlik ónimder, sýsyndar jáne erekshe hosh ıisti shafran shaıy sııaqty aýǵan taýarlarynyń keń tańdaýy usynady.
Tashkentte Ózbekstan, Qazaqstan jáne Qyrǵyzstan kınologtary tájirıbe almasýda — ÓzA
Tashkent qalasyndaǵy Memlekettik kınologııa ortalyǵynda «Shekara keden beketterinde esirtki zattaryn izdeý boıynsha qyzmet ıtterin daıyndaý jáne paıdalaný erekshelikteri» atty aımaqtyq oqý-tájirıbelik semınar óz jumysyn bastady.
Bul týraly «ÓzA» aqparat agenttigi málimdedi.
Habarlamada aıtylýynsha, bul semınar TMD-ǵa múshe memleketterdiń keden qyzmetteri basshylary keńesiniń turaqty jumys isteıtin organy — quqyq qorǵaý bólimsheleri basshylary komıteti qyzmeti aıasynda uıymdastyrylyp otyr. Іs-sharaǵa Ózbekstan, Qazaqstan jáne Qyrǵyzstannyń keden qyzmeti men kınologııa ortalyqtarynyń ókilderi qatysýda.
Ózbekstandyq BAQ-tyń dereginshe, semınardyń alǵashqy kúninde qatysýshylar Memlekettik kınologııa ortalyǵynyń qyzmetimen, onyń qurylymy men oqý bazasymen, sondaı-aq qyzmettik ıtterdi daıarlaý úderisterimen tanysty. Qatysýshylarǵa ıtterdi izdestirý, jattyqtyrý jáne kedendik baqylaý beketterinde paıdalaný tájirıbesi kórsetildi.
Sondaı-aq osy aptada «ÓzA»-da «Tashkentte Ózbekstan-Qazaqstan bıznes forýmy ótti» degen taqyryptaǵy aqparat jarııalandy.
Atalǵan aqparat kóziniń dereginshe, Tashkent qalasynda Ózbekstan Investıtsııalar, ónerkásip jáne saýda mınıstrligi men Qazaqstan Saýda jáne ıntegratsııa mınıstrliginiń birlesip uıymdastyrýymen Ózbekstan–Qazaqstan bıznes forýmy ótti.
Jıynda eki eldiń mınıstrlikteri, salalyq birlestikteri jáne kompanııalarynan 100-den astam ókili qatysty. Olar qatarynda «QazTrade» AQ, «Kedentransservis» AQ, «iMas Group», «Medial Group», «Asyl Dan Trade», «StalTsink», «Empire Food» jáne basqa da uıymdar bar.
Іs-shara barysynda Ózbekstan Investıtsııalar, ónerkásip jáne saýda mınıstriniń orynbasary Hýrram Teshabaev pen Qazaqstan Saýda jáne ıntegratsııa mınıstriniń orynbasary Aıdar Ábildabekov sóz sóılep, qazirgi ekonomıkalyq baılanystar jáne olardy jańa deńgeıge kóterý máselelerine toqtaldy.
Sondaı-aq ártúrli salalar boıynsha birneshe yntymaqtastyq kelisimderge qol qoıylǵan.
Araqchı Qazaqstan Ulttyq kúnimen quttyqtady — ParsToday
IIR Syrtqy ister mınıstri Seıed Abbas Araqchı 25 qazan — Ulttyq kún jáne Qazaqstan Respýblıkasy kúnine oraı Qazaqstan Respýblıkasynyń Syrtqy ister mınıstri Ermak Kósherbaevqa quttyqtaý hatyn joldady, dep jazdy ParsToday aqparat agenttigi. ParsToday aqparat agenttiginiń málimeti boıynsha, bul joldaýda Iran Syrtqy ister mınıstri dostyq jáne baýyrlas Qazaqstan úkimeti men halqyn osy ulttyq merekemen shyn júrekten quttyqtaı otyryp, eki el arasyndaǵy dostyq qarym-qatynastar men ekijaqty yntymaqtastyq barlyq salada odan ári keńeıe túsedi degen úmit bildirdi.
Sondaı-aq osy aptada ParsToday basylymynda «Úndistan dıplomaty: Irannyń Ortalyq Azııaǵa tikeleı shyǵý jolyndaǵy orny erekshe» degen taqyryptaǵy aqparat jarııalandy.
Irandyq BAQ-tyń málimetinshe, beısenbi kúni úndistandyq dıplomat Chabahar portyndaǵy Úndistannyń qyzmetine silteme jasaı otyryp, Irannyń Qazaqstan men Ortalyq Azııa elderine tikeleı shyǵý turǵysynan erekshe jaǵdaı ekenin aıtty.
Almatydaǵy Úndistan elshiliginiń basshysy IIR-nyń qaladaǵy Bas konsýly Sona Ahmadımen kezdesti. Kezdesý barysynda ekijaqty qarym-qatynas máseleleri talqylaǵan. Úndistan elshiliginiń basshysy Chabahar portyndaǵy Úndistannyń qyzmetine toqtalyp, Irannyń Qazaqstan men Ortalyq Azııa elderine tikeleı shyǵý orynyń erekshe dep atap, barlyq elder bul múmkindikti paıdalanýy kerek, degen.
Túrki memleketteri ortaq álipbı arqyly birlikke umtylýda — TRT
Túrki Memleketteri Uıymynyń 12-shi sammıtinde kóshbasshylar tildi biriktirýge, mádenı baılanystardy nyǵaıtýǵa jáne túrki elderinde tsıfrlyq ınnovatsııalardy arttyrýǵa baǵyttalǵan 34 áripten turatyn ortaq túrki álipbıin tanystyrdy, dep habarlaıdy Túrkııa Radıo Televızııa portaly.
Túrki Memleketteri Uıymynyń (TMU) 12-shi sammıti «Aımaqtyq beıbitshilik pen qaýipsizdik» taqyrybyna arnalǵan bolatyn.
«TRT»-nyń dereginshe, alaıda kóptegen adam úshin túrki kóshbasshylarynyń bul jınalysynan eń este qalarlyq mańyzdy habarlama qaýipsizdik taqyrybynda emes. Eń este qalarlyǵy — álipbı týraly habar.
Atap aıtqanda, Túrkııa prezıdenti Rejep Taıyp Erdoǵan sammıtke qatysqan kóshbasshylarǵa eki kitap syılady. Biri qyrǵyz jazýshy Shyńǵys Aıtmatovtyń shyǵarmalary, al ekinshisi túrki halyqtarynyń ańyzdaryna negizdelgen «Oǵyznama». Bul kitaptar jańa usynylǵan 34 áriptik Ortaq Túrki Álipbıimen basylyp shyqqan.
Túrkııalyq BAQ-tyń málimetinshe, bul qadam saıası, mádenı jáne tehnologııalyq turǵydan tereń maǵynaǵa ıe.
Aıta keteıik, Túrki tildes halyqtar arasynda ortaq álipbı jasaý ıdeıasy jańa emes.
Bul ıdeıa 1926 jyly Bakýde ótken Birinshi Túrkologııa Kongresinde alǵash ret kóterilgen bolatyn, sol kezde ǵalymdar men memleket qaıratkerleri latyn negizindegi álipbı týraly oı qozǵaǵan.
Alaıda Keńes Odaǵynyń bıligi kezinde bul joba toqtap, túrki respýblıkalary kırıllıtsaǵa kóshýge májbúr bolǵan.
1991 jyly Keńes Odaǵy ydyraǵannan keıin bul arman qaıta jandandy.
«TRT»-nyń deregine súıensek, qazirgi ýaqytta bul bastama TMU aıasynda jańa serpinge ıe boldy.
2024 jyldyń qyrkúıeginde Ázerbaıjanda ortaq túrki álipbıi komıssııasy jınalyp, túrki tilderiniń fonetıkalyq túrliligin eskere otyryp, shekaraaralyq saýattylyqty qamtamasyz etetin 34 áriptik júıeni bekitti.
Túrkııalyq basylym Túrki memleketteri ortaq álipbıi týraly shaǵyn maqalada ary qaraı «Álipbı men tehnologııa» jáne «Mádenı úılesim» degen eki taqyryp boıynsha keńinen toqtalǵan.