Túrki memleketteri kıberqaýipsizdik salasyndaǵy yntymaqtastyqty jańa deńgeıge kóteredi — Erdoǵan
ASTANA. KAZINFORM — Damyǵan jáne damýshy elder arasyndaǵy tsıfrlyq alshaqtyqty qysqartýǵa aıryqsha nazar aýdarý qajet. Bul týraly Túrki memleketteri uıymynyń beıresmı sammıtinde Túrkııa Prezıdenti Rejep Taııp Erdoǵan aıtty.
— Jasandy ıntellektini múmkindik retinde qarastyrý kerek. Biraq tehnologııalar jahandyq ústemdik quralyna aınalmaýy úshin durys tásilmen qaraý qajet. Biz damyǵan jáne damýshy elder arasyndaǵy tsıfrlyq alshaqtyqty qysqartýǵa aıryqsha nazar aýdarýymyz kerek. Bul bizdiń ortaq ustanymymyzdyń bir bóligine aınalýy tıis. Biz uıymymyzdyń baqylaýshy memleketteri de tehnologııalyq damýdyń múmkindikterin, sonyń ishinde BUU tetikteri men basqa da halyqaralyq platformalar arqyly paıdalana alǵanyn qalaımyz, — dedi Túrkııa Prezıdenti.
Onyń paıymynsha, jasandy ıntellektiniń damýymen baılanysty jańa tehnologııalyq syn-qaterler men táýekelderge muqııat qaraý qajet.
— Qazirgi álemde kıberqaýipsizdik qurlyqtaǵy da, teńizdegi de jáne áýedegi de qaýipsizdik sııaqty mańyzdy. Osyǵan baılanysty biz uıymymyz aıasyndaǵy kıberqaýipsizdik salasyndaǵy yntymaqtastyqty úılestirýdi jańa deńgeıge kóterýge nıettimiz, — dedi Rejep Taııp Erdoǵan.
Aıta keteıik, sammıtte Memleket basshysy Túrki memleketteri uıymy geosaıası joba nemese áskerı uıym emestigin, ol baýyrlas elderdiń saýda-ekonomıkalyq, joǵary tehnologııalyq, tsıfrlyq jáne mádenı-gýmanıtarlyq yntymaqtastyǵyn nyǵaıtatyn mańyzdy alań ekenin atap ótti.
