Túrki memleketteri energııa salasyndaǵy yntymaqtastyqty arttyrady – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Býkmekerlik qyzmetterdi jarnamalaıtyn 70-ke jýyq veb-saıt buǵattaldy – ÓzA
Básekelestikti qorǵaý komıteti qumar jáne táýekelge negizdelgen oıyndardy nasıhattaýǵa baǵyttalǵan veb-saıttar boıynsha kezekti zertteý men taldaý nátıjelerin jarııalady.
Komıtet habarynsha, jarnamaǵa qatysty zańbuzýshylyqtarǵa jedel sharalar kórý maqsatynda tıisti uıymdarmen ózara yntymaqtastyq jolǵa qoıylǵan. Bul týraly osy aptada «ÓzA» aqparat agenttigi habarlady.
Habarlamada málim bolǵandaı, sonymen birge býkmekerlik qyzmetterge qatysty jarnamany taratýǵa baǵyttalǵan veb-saıttarǵa qoljetimdilikti shekteý (buǵattaý) sharalary júzege asyrylyp jatyr. Atap aıtqanda, bıyl atqarylǵan jumystar nátıjesinde býkmekerlik qyzmetterdi nasıhattaıtyn 86 veb-saıtty buǵattaý boıynsha tıisti baqylaý organyna aqparat joldanyp, sonyń ishinde 70-ke jýyq saıt belgilengen tártippen buǵattalǵan.
Ózbekstandyq BAQ-tyń dereginshe, «Jarnama týraly» zańnyń 46-babyna sáıkes, qumar oıyndary jáne táýekelge negizdelgen ózge de oıyndar jarnamasyna tyıym salynady.
Iranda basqarý salasynda áıelderdiń mańyzy qaı deńgeıde – Eurasia Today
Keıingi jyldary Iranda áıelderdiń róli aıtarlyqtaı ózgeriske ushyrady. Eurasia Today aqparat agenttinde bul týraly ırantanýshy PHD Gúlbaqyt Qudaıbergenovanyń málimdemesi keltirilgen.
Atalǵan basylymnyń dereginshe, buryn qoǵam men sarapshylardyń nazary negizinen quqyqtyq jáne áleýmettik shekteýlerge aýdarylsa, qazirgi jaǵdaı, ásirese bilim, kásibı qyzmet jáne saıası salalarda shynaıy jetistikterdi kórsetedi. Bul eldiń áleýmettik jáne ekonomıka salalarynda eleýli ózgerister úshin jańa múmkindikter qalyptastyrady.
Áıelder bilim berý deńgeıinde kóp ýaqyt boıy ýnıversıtet stýdentteri men akademııalyq qaýymdastyq músheleriniń kópshiligin qurady.
Eurasia Today aqparat agenttiniń keltirgen málimetine súıensek, 2025 jylǵa qaraı áıelder ǵylymı keńes músheleri men zertteýshilerdiń 56 paıyzdan astamyn qurady, al stýdentter arasynda bul kórsetkish 63 paıyzǵa jetti.
Sondaı-aq áıelderdiń basqarý jáne qoǵamdyq saladaǵy jetistikteri de aıtarlyqtaı aıqyndalǵan. Atap aıtqanda, keıingi jyldary ondaǵan áıel basqarýshylyq qyzmetke, sonyń ishinde mınıstrlikke, memlekettik mekemelerge jáne elshiler men bas konsýldar sııaqty dıplomatııalyq laýazymdarǵa taǵaıyndaldy. Bul el tarıhynda alǵash ret áıelderdiń dástúrli túrde er adamdarǵa tıesili sanalatyn mamandyqtardaǵy tabysynyń turaqty úlgilerin qalyptastyryp, áıelder basqarý úderisterindegi belsendilerge aınaldy. Bul olardyń kásibı ustanymdaryn nyǵaıtyp qana qoımaı, sonymen qatar áıelderdiń resmı saıasattaǵy quzyrynyń birtindep keńeıgenin bildiredi.
Beıjińde Qytaı-Qazaqstan ádebı konferentsııasy ótti – «Halyq gazeti»
10 jeltoqsan kúni Qytaı Jazýshylar odaǵy men Qazaqstan Jazýshylar odaǵy birlesip, Beıjińdegi Qazaqstan Mádenıet ortalyǵynda Qytaı-Qazaqstan ádebı konferentsııasyn ótkizdi. Іs-sharaǵa Qytaı Jazýshylar odaǵy tóraǵasynyń orynbasary Ý Itsın men Qazaqstan Jazýshylar odaǵynyń tóraǵasy Mereke Kulkenov qatysyp, sóz sóıledi, dep habarlady Qytaıdyń «Halyq gazeti» basylymy.
Qytaılyq BAQ-tyń málimetinshe, konferentsııada eki tarap «Qytaı Jazýshylar odaǵy men Qazaqstan Jazýshylar odaǵy arasyndaǵy yntymaqtastyq týraly ózara túsinistik memorandýmyna» qol qoıdy. Memorandýmǵa sáıkes, eki odaq Halyqaralyq jastar poezııasy festıvali, qytaıtanýshylardyń ádebı aýdarmasy boıynsha halyqaralyq sımpozıým jáne «Bir beldeý, bir jol» ádebı alıansy sııaqty platformalarda tyǵyz qarym-qatynasty jalǵastyrady. Bul baılanys qalamgerlerdiń qos tarapqa ózara qatynaýyn, týyndylarynyń aýdarylyp basylýyn, sondaı-aq ádebı forýmdardy birlesip ótkizý yntymaqtastyǵyn tereńdetedi.
Aıta ketý kerek, konferentsııa barysynda qos eldiń jazýshylary Qazaqstan jazýshylarynyń kitap kórmesin aralady. Aıtýly shara barysynda jyr oqylyp, án aıtylyp, kúı tartylyp, qalam ustaýshylardyń shabyty bekemdeldi.
Sonymen qatar osy aptada «Halyq gazeti» basylymynda «Astana LRT qyzmetkerleri kásiptik daǵdy boıynsha 3 aılyq sabaq alý úshin Tıantszın qalasyna keldi» degen taqyrypta aqparat jaryq kórdi.
Qytaılyq basylymnyń dereginshe, 5 jeltoqsanda Astana LRT-nyń mamandarynyń ekinshi toby Tıantszınde oqý-jattyǵý kýrsynyń ashylý saltanatyn ótkizgen.
Atap aıtqanda, oqý kýrsy 3 aıǵa sozylady. Onda «teorııa + praktıka» oqytý modelin ustana otyryp, kólik quraldary, baılanys, dabyl, elektrmen jabdyqtaý, kólik júrgizýdi uıymdastyrý sııaqty 7 negizgi kásibı kýrstardy uıymdastyrady. Bul tyńdaýshylarǵa tolyqqandy kásibı teorııalyq negiz qurýǵa jáne birlesken komandalyq qabiletti júıelendirýge kómektesedi.
Buǵan deıin Tıantszın Temirjol tranzıttik toby Astanaǵa bir aılyq teorııalyq dáriske kásibı mamandardy jibergen bolatyn.
Iran shóldi el me? – ParsToday
Sheteldik paıdalanýshylardyń Google-da jıi qoıatyn suraqtarynyń biri – Iran tek shóldi jáne qurǵaq el me? Bul týraly ParsToday aqparat agenttigi jazdy.
Atalǵan BAQ-tyń dereginshe, Irannyń jaı ǵana shóldi jáne qurǵaq el ekeni týraly túsinik kóbinese BAQ-taǵy jáne keıbir qoǵamdyq derekkózderdegi stereotıptik beınelerge baılanysty bolyp otyr. Degenmen, Irannyń shyndyǵy áldeqaıda basqasha jáne kúrdelirek.
ParsToday málimetinshe, Iran – 1,6 mln km² astam aýmaqty alyp jatqan keń baıtaq jer jáne óziniń erekshe geografııalyq ornalasýyna baılanysty klımattyq ártúrlilikke ıe. Kópshiliktiń pikirine qaıshy, Iran – jaı ǵana shóldi emes; bul tórt mezgili bar el, onda onyń ártúrli bólikteri bir ýaqytta ártúrli aýa raıyn baıqaýǵa bolady.
Keltirilgen aqparattarǵa súıensek, eldiń soltústiginde, qalyń ormandar men mol jaýyn-shashynmen erekshelenetin Alborz taý jotasy ornalasqan. Sondaı-aq Rasht jáne Sarı sııaqty qalalardyń klımaty jaýyn-shashynnyń kóptigine baılanysty shóldi aımaqtardan múldem ózgeshe. Al ońtústikte Parsy shyǵanaǵy men Oman teńiziniń jaǵalaýlary jyly jáne ylǵaldy klımatymen tanymal ekeni aıtylady. Sonymen qatar batysynda qarly qysy men jumsaq jazy bar Zagros taý jotasy Iran tabıǵatynyń taǵy bir qyryn usynady.
Irandyq basylym jazba sońynda suraqtyń jaýabyn aıqyndaıdy. Iran tek shóldi el ǵana emes, sonymen qatar tabıǵı jáne klımattyq ártúrliligi mol, ár buryshy erekshe álemdi usynady dep qortyndylaıdy.
Sondaı-aq osy aptada ParsToday-de «Nelikten álemdik tranzıttiń bolashaǵy Iransyz múmkin emes?» degen taqyryptaǵy aqparat jaryq kórdi.
Atalǵan BAQ-tyń dereginshe, Soltústik-Ońtústik jáne Shyǵys-Batys dálizderiniń ortalyǵynda ornalasqandyqtan, Iran jahandyq saýdadaǵy strategııalyq oıynshyǵa jáne geosaıası teńdeýlerdiń negizgi oıynshysyna aınaldy.
Úndistan men Reseı arasynda «2030 jol kartasyna» qol qoıylǵannan keıin halyqaralyq dálizderdiń mańyzdylyǵy taǵy da geosaıası damýdyń ortalyǵyna qoıyldy, munda Iran óziniń erekshe ornymen jahandyq teńdeýlerdiń jańa habyna aınaldy.
ParsToday Hamshahri Online basylymyna silteme jasaı otyryp, Soltústik-Ońtústik dálizine qatysty bul kelisimniń basty nazary Irannyń Úndi muhıtyn Reseı men Eýropamen baılanystyrýdaǵy mańyzdy rólin taǵy da atap ótti. Bul baǵyt tasymaldaý ýaqytyn eki esege qysqartýy múmkin.
Sondyqtan Iran álemdegi eki úlken dálizdiń, Soltústik-Ońtústik jáne Shyǵys-Batys dálizderiniń qıylysynda ornalasqan jáne bul pozıtsııa ony jahandyq saýdanyń tabıǵı ortalyǵyna aınaldyrǵanyn aıtady.
Túrki memleketteri energııa salasyndaǵy yntymaqtastyqty arttyrady – TRT
Ystanbulda ótken iri aımaqtyq energetıkalyq sammıtte Ankara túrikmen gazyn Eýropaǵa jetkizý úshin Kaspıı teńizi arqyly ótetin baǵyt boıynsha naqty qadamdar jasaýdy talap etti. Bul týraly osy aptada Túrkııa Radıo Televızııa portaly habarlady.
TRT-nyń dereginshe, Túrkııa Energetıka jáne tabıǵı resýrstar mınıstri Alparslan Baıraktar Ankaranyń Túrikmenstannyń tabıǵı gaz qoryn Túrkııaǵa jáne Eýropaǵa jetkizýge baǵyttalǵan uzaq jyldardan beri keıinge qalyp kele jatqan josparlardy ilgeriletýge kúsh salyp jatqanyn málimdedi. Ol uzaq talqylanyp kele jatqan Trans-Kaspıı gaz qubyryn óńirdiń energııa qaýipsizdigi úshin «strategııalyq turǵydan asa mańyzdy» dep sıpattady.
Ystanbulda Túrki Memleketteri Uıymy (TMU) Energetıka mınıstrleri keńesiniń 5-otyrysyna tóraǵalyq etken Baıraktar Túrkııanyń uzaq ýaqyt boıy turalap qalǵan jobany «naqty kezeńge shyǵarýdy» jáne Ázerbaıjan, Túrikmenstan jáne ózge óńirlik seriktestermen úılesimdi túrde alǵa jyljytýdy resmı túrde usynǵanyn aıtty.