Túrki memleketteri aǵylshyn tilinen ortaq emtıhan ázirlemek
ASTANA. KAZINFORM — Túrki memleketteriniń Ulttyq testileý ortalyqtary aǵylshyn tilin meńgerý deńgeıin baǵalaýdyń óńirlik júıesin qurý týraly memorandýmǵa qol qoıdy.
«Qarqyndy ózgeris álemindegi qabyldaý emtıhandary» halyqaralyq konferentsııasynyń ekinshi kúni Ázerbaıjan, Qazaqstan, Qyrǵyzstan, Túrkııa jáne Ózbekstannyń ulttyq testileý ortalyqtary aǵylshyn tilin meńgerý deńgeıin baǵalaýǵa arnalǵan ETOTS (English Test for Turkic States) birlesken emtıhanyn qurý jónindegi yntymaqtastyq týraly memorandýmǵa qol qoıdy.
Qujat tildik baǵalaý salasyndaǵy ulttyq uıymdar arasyndaǵy yntymaqtastyqty damytýǵa, aǵylshyn tili boıynsha emtıhandy ázirleý, ótkizý, onyń nátıjelerin taný jáne sapasyn qamtamasyz etýdiń ortaq tetigin qalyptastyrýǵa baǵyttalǵan. Bastama qatysýshy elderdiń sarapshylyq áleýetin biriktirip, halyqaralyq tásilderge sáıkes keletin qosymsha óńirlik baǵalaý quralyn qurýdy kózdeıdi. Bul rette ETOTS qoldanystaǵy halyqaralyq tildik emtıhandardy almastyrýdy maqsat etpeıdi.
- ETOTS – aǵylshyn tilin baǵalaýǵa arnalǵan birlesken emtıhan ǵana emes, elderimizdiń bilim berý júıeleri arasyndaǵy senimdi nyǵaıtýǵa baǵyttalǵan naqty qadam. Ulttyq testileý ortalyqtarynyń sarapshylyq áleýetin biriktire otyryp, akademııalyq utqyrlyqqa qosymsha múmkindikter ashamyz jáne bilim sapasyn baǵalaý salasyndaǵy óńirlik yntymaqtastyqty damytamyz, – dep atap ótti Ulttyq testileý ortalyǵynyń dırektory Nurseıit Baıjanov.
Taraptar test tapsyrmalaryn birlesip ázirleýdi, qorǵalǵan kompıýterlik testileýdi qamtamasyz etýdi, psıhometrııalyq valıdatsııa júrgizýdi jáne emtıhan nátıjelerin óńirlik deńgeıde taný tetikterin pysyqtaýdy josparlap otyr. Aıta ketsek, memorandýmǵa basqa da túrki memleketteriniń ulttyq baǵalaý uıymdary qosyla alady.
Konferentsııanyń ekinshi kúni Admissions Insight Test (AIT) jobasy talqylandy. Oqý-aǵartý mınıstrliginiń ókilderine, joǵary oqý oryndarynyń, sheteldik ýnıversıtetter fılıaldarynyń basshylaryna jáne óńirlik bilim basqarmalarynyń ókilderine arnalǵan aqparattyq sessııa barysynda Ulttyq testileý ortalyǵy emtıhan tujyrymdamasyn, ony ázirleý jáne engizý kezeńderin, qurylymy men daǵdylardy baǵalaý komponentin, sondaı-aq qoldanystaǵy qabyldaý testileý modelinen aıyrmashylyqtaryn tanystyrdy. Sonymen qatar Y.Altynsarın atyndaǵy Ulttyq bilim akademııasynyń jańa emtıhandy ázirleýge baılanysty memlekettik jalpyǵa mindetti bilim berý standarttary men úlgilik oqý baǵdarlamalaryna ózgerister engizý baǵytyndaǵy jumysy tanystyryldy.
Konferentsııanyń eki kúni halyqaralyq yntymaqtastyqty nyǵaıtýǵa, sarapshylyq tájirıbe almasýǵa jáne qazirgi bilim berý júıesiniń talaptaryna saı qabyldaý men tildik baǵalaýdyń jańa tásilderin damytýǵa múmkindik berdi.
Aıta ketelik Túrki memleketteriniń ortaq kartasy jasalatyny týraly jazǵan edik.
