Túrik mádenıeti ortalyǵynda «Dástúr jalǵastyǵy: babalar amanaty» kórmesi ashylady
ALMATY. KAZINFORM – 2025 jyly 30 qazan kúni saǵat 18:00-de Amsterdam qalasyndaǵy (Nıderland Koroldigi) Túrik mádenıeti ortalyǵynda Almaty qalasy mýzeıler birlestiginiń «Dástúr jalǵastyǵy: babalar amanaty» atty kórmesi ashylady.
Іs-shara Almaty qalasy ákimdiginiń qoldaýymen jáne Qazaqstan Respýblıkasynyń Nıderland Koroldigindegi Elshiligimen birlese uıymdastyrylyp otyr.
Kórmeniń negizgi maqsaty – Qazaqstan men Nıderland Koroldigi arasyndaǵy mádenı baılanysty nyǵaıtý, sondaı-aq Uly Dala halqynyń baı tarıhyn, kóshpeli órkenıettiń mádenıetin, qazaq halqynyń dástúrli turmysyn, fılosofııasy men dúnıetanymyn keńinen tanystyrý.
Ekspozıtsııada Almaty qalasy mýzeıler birlestiginiń qorynan alynǵan 70-ten astam biregeı jádiger usynylady. Olardyń arasynda qazaq halqynyń turmys-tirshiligi men qoldanbaly ónerin beıneleıtin etnografııalyq buıymdar, tarıhı fotosýretter jáne qazaq pen túrki halyqtarynyń mýzykalyq aspaptary bar.
Qazaqstan Respýblıkasy men Nıderland Koroldigi arasyndaǵy dıplomatııalyq qatynas 1992 jyly 10 qyrkúıekte ornatylǵan. Amsterdamdaǵy Túrik mádenıeti ortalyǵy – túrki mádenıeti men ónerin álemge keńinen tanytýdy maqsat etken bedeldi uıym.
Almaty qalasy mýzeıler birlestigine qarasty Almaty qalasy tarıhy mýzeıi – elimizdiń mádenı jáne qoǵamdyq ómirine belsendi úles qosyp kele jatqan zamanaýı mádenı mekemelerdiń biri. Sońǵy jyldary birlestik halyqaralyq seriktestik baǵytynda aıtarlyqtaı tabysqa qol jetkizdi.
Mýzeı qorlaryndaǵy erekshe toptamalar buǵan deıin Seýl (Koreıa Respýblıkasy), Ystambul (Túrkııa), Neapol (Italııa), Vena (Avstrııa), Praga (Chehııa), Kartsag (Vengrııa) jáne Belgrad (Serbııa) qalalarynda tanystyryldy.
2025 jyly maýsym aıynda Parıj qalasynda (Frantsııa), ıÝNESKO shtab-páterinde ótken kórme uly kompozıtor, dırıjer jáne kúıshi Nurǵısa Tilendıevtiń 100 jyldyǵyna arnaldy.
«Dástúr jalǵastyǵy: babalar amanaty» kórmesi – Uly Dala mádenı murasyn Eýropa halqyna tanytatyn, qazaq rýhanııaty men tarıhynyń tereń tamyryn pash etetin mańyzdy mádenı oqıǵa bolmaq.
Aıta keteıik, Ulttyq mýzeıde Qytaıdyń ejelgi qolóner jaýharlary kórmesi ashyldy.