Túrik lıtseıine qarýly shabýyldan jaraqat alǵandar bar

ASTANA. KAZINFORM – Túrkııanyń Shanlyýrfa provıntsııasyndaǵy Sıverek qalasynda burynǵy oqýshy lıtseı ǵımaratynda oq jaýdyrdy, dep habarlaıdy Kazinform-nyń Ankaradaǵy menshikti tilshisi. 

Shanlyýrfa provıntsııasy Sıverek aýdanyndaǵy «Ahmet Koyuncu Mesleki ve Teknik Anadolu Lisesi» lıtseıinde qarýly shabýyl boldy. Milliyet basylymynyń habarlaýynsha, 19 jastaǵy osy lıtseıde buryn bilim alǵan oqýshy ǵımaratqa myltyqpen kirip, jan-jaǵyna oq jaýdyra bastaǵan.

Shabýyl saldarynan 16 adam jaraqat aldy, onyń ishinde 10 oqýshy, tórt muǵalim, bir polıtsııa qyzmetkeri jáne mektep býfetiniń qyzmetkeri bar. Jaraqat alǵandardyń tórteýiniń jaǵdaıy ortasha, olar provıntsııa astanasyndaǵy aýrýhanalarǵa aýystyryldy, al qalǵandary Sıverek memlekettik aýrýhanasynda em alyp jatyr.

Kýágerlerdiń aıtýynsha, úreılengen keıbir oqýshylar terezelerden sekirgen. Ǵımaratta bolǵandardyń kópshiligi tez arada evakýatsııalandy.

Shabýyldaýshy mekteptiń ishine tyǵylyp, oqıǵa ornyna kelgen qaýipsizdik kúshterine berilýden bas tartty. Arnaıy kúshter ǵımaratty qorshap alǵannan keıin ol sol qarýdan ózine oq atty.

Provıntsııa gýbernatorynyń málimdeýinshe, shabýyldan qaza tapqandar joq. Ol sondaı-aq oqıǵany jan-jaqty tergeýge ýáde berdi. Túrkııa ІІM de oqıǵanyń mán-jaıyn keń aýqymdy tergeýdiń bastalǵanyn habarlady.

Aldyn ala aqparatqa sáıkes, shabýyldaýshy buryn osy lıtseıde oqyǵan, biraq keıinnen ashyq bilim berý júıesinde bilimin jalǵastyrǵan. Qylmystyń sebebi anyqtalyp jatyr.

Osyǵan deıin Ystanbuldaǵy Izraıl konsýldyǵy mańyndaǵy atys isi boıynsha 11 adam ustalǵanyn jazdyq.