Túrik lırasy óz qunynyń 97%-yn joǵaltty

ASTANA. KAZINFORM — Túrkııanyń valıýta naryǵy kezekti, biraq tanys ózgeristi bastan keshirip otyr: lıra kýrsy tarıhta alǵash ret bir dollarǵa shaqqanda 42 lıradan asty, dep habarlaıdy Kazinform menshikti tilshisi. 

Belgili bolǵandaı, Túrkııanyń ulttyq valıýtasy 2010 jyldan beri óz qunynyń shamamen 97%-yn joǵaltty, bul mıllıondaǵan azamattyń jınaqtary joıylǵanyn bildiredi.

Túrik lırasy uzaqqa sozylǵan ekonomıkalyq daǵdarys jáne ınvestorlardyń eldiń qarjylyq saıasatyna degen seniminiń joǵalýynyń sımvolyna aınalyp, quldyrap jatyr. Osy aptada aıyrbas baǵamy bir dollar úshin 42 lıradan asty — bul sońǵy 15 jylda valıýtanyń qunsyzdaný tereńdigin kórsetetin jańa rekordtyq quldyraý.

Eldegi ınflıatsııa álemdegi eń joǵary kórsetkishterdiń birin kórsetip otyr — sarapshylardyń baǵalaýynsha, Túrkııadaǵy naqty baǵanyń ósýi resmı kórsetkishterden aıtarlyqtaı asyp túsedi.

Ekonomıster daǵdarysty uzaq ýaqyt boıy arzan aqsha saıasatymen jáne úkimettiń ortalyq bank sheshimderine aralasýymen baılanystyrdy. Prezıdent Rejep Taııp Erdoǵan uzaq jyl boıy ınflıatsııanyń ósýine qaramastan paıyzdyq mólsherlemelerdi tómendetýdi talap etip keldi, bul sheteldik ınvestorlardyń senimin ketirip, valıýtaǵa qysymnyń artýyna ákeldi.

Lıranyń qunsyzdanýy kúndelikti ómirde sezilip otyr. Azyq-túlik, otyn jáne páter aqysy aı saıyn derlik ósip keledi, al turǵyndar jınaqtaryn dollar men altynǵa aınaldyryp jatyr.

Sarapshylardyń pikirinshe, aqsha-nesıe saıasatyn turaqtandyrý jáne eldiń negizgi retteýshisiniń táýelsizdigin qalpyna keltirý boıynsha sheshýshi sharalar qabyldanbasa, ulttyq valıýta qunsyzdanýdy jalǵastyryp, ekonomıkalyq jáne áleýmettik máselelerdi ýshyqtyrýy múmkin.

Buǵan deıin Túrkııadaǵy ulttyq valıýtanyń qunsyzdanýy saldarynan eldegi eń iri banknot — 200 lıranyń quny 5 AQSh dollarynan tómen túskenin habarlaǵan bolatynbyz.