Túrik lırasy qunsyzdandy: 200 lıranyń quny 5 dollardan tómendedi

ASTANA. KAZINFORM – Túrkııadaǵy ulttyq valıýtanyń qunsyzdanýy saldarynan eldegi eń iri banknot – 200 lıranyń quny 5 AQSh dollarynan tómen tústi. Bul jaǵdaı sońǵy jyldary Túrkııa ekonomıkasy tap bolǵan problemalardyń aýqymyn aıqyn kórsetip otyr.

16 qyrkúıektegi jaǵdaı boıynsha 1 dollar shamamen 41 túrik lırasyna, al 1 eýro 48,5 lıraǵa teń.

Sońǵy valıýta naryǵy derekterine sáıkes, 200 lıra endi 5 dollardan az somaǵa aıyrbastalady. Birneshe jyl buryn bul banknotpen 30 dollardan astam alýǵa bolatyn.

Ulttyq valıýtanyń qunsyzdanýy túrikterdiń kúndelikti qajetti taýarlaryn barǵan saıyn qymbattatyp, halyqtyń satyp alý qabiletin tómendetip, ınflıatsııalyq qysymdy kúsheıtip otyr.

Sarapshylar lıranyń álsireýin birqatar faktorlarmen baılanystyrady: aqsha-nesıe saıasatynyń turaqsyzdyǵy, joǵary ınflıatsııa, ınvestorlardyń ketýi jáne geosaıası shıelenister. Túrkııa Ortalyq bankiniń ınflıatsııany ustap turýǵa talpynysyna qaramastan, lıra qunsyzdanýyn jalǵastyrýda.

Mundaı jaǵdaıda elde joǵary nomınaldy jańa banknota engizý jóninde pikirler aıtylýda. Qazir qolma-qol esep aıyrysýdaǵy eń iri aqsha – 200 lıra. Degenmen, sońǵy 16 jylda onyń satyp alý qabileti 95 paıyzǵa tómendegen.

Eske salaıyq, 2025 jyldyń alǵashqy bes aıynda túrik lırasy damýshy elderdiń valıýtalary arasynda eń nashar dınamıka kórsetken edi.