Túrik lırasy damýshy elderdiń valıýtalary arasynda qunsyzdaný jaǵynan ekinshi orynǵa shyqty

ASTANA. KAZINFORM – 2025 jyldyń alǵashqy bes aıynda túrik lırasy damýshy elderdiń valıýtalary arasynda eń nashar kórsetkishterdiń birin kórsetti, dep habarlaıdy Kazinform agenttiginiń menshikti tilshisi.

AQSh dollaryna qatysty túrik lırasynyń baǵamy jyl basynan beri 10,9%-ǵa ósti, bul túrik valıýtasyn uqsas ekonomıkalar arasynda qunsyzdaný boıynsha ekinshi orynǵa shyǵardy.

Qunsyzdaný boıynsha kóshbasshy — Argentına valıýtasy. Argentınalyq peso óz qunynyń 15,33%-yn joǵaltty. Al reseı rýbli geosaıası jáne ekonomıkalyq qıyndyqtarǵa qaramastan 31,71%-ǵa nyǵaıyp, eń kóp kúsheıgen valıýta atandy.

Álemdik valıýtalar qorjynyna qatysty AQSh dollarynyń kúshin kórsetetin dollar ındeksi jyl basyndaǵy 109,209 deńgeıinen mamyr aıynyń sońynda 99,259-ǵa deıin tómendedi. Dollardyń jalpy álsireýine qaramastan, túrik lırasy óz ustanymyn joǵaltýdy jalǵastyrdy. 1 qańtarda 1 AQSh dollaryna 35,3585 lıra berilse, 30 mamyrǵa qaraı bul kórsetkish 39,2098 lıraǵa jetti.

Lıranyń bulaısha kúrt qunsyzdanýy ishki ınvestorlardy da, halyqaralyq sarapshylardy da alańdatýda. Negizgi sebepter — ınflıatsııanyń saqtalýy, syrtqy ınvestıtsııalardyń az kelýi, ımportqa táýeldiliktiń joǵary bolýy jáne eldiń ekonomıkalyq saıasatyna senimniń shekteýligi.

Ekonomıster qurylymdyq reformalar men turaqty makroekonomıkalyq saıasatsyz lıraǵa degen senimdi qalpyna keltirý men valıýta naryǵyndaǵy turaqtylyqqa qaıta qol jetkizý qıyn bolatynyn aıtýda.

Buǵan deıin Morgan Stanley ınvestıtsııalyq banki óz jańa taldamalyq esebinde 2025 jyldyń ekinshi jartysynda Túrkııa ekonomıkasynyń perspektıvalaryna qatysty optımıstik kózqaras bildirgeni habarlanǵan bolatyn. Alaıda bul málimdemeden bir apta buryn túrik lırasynyń baǵamy taǵy da quldyrady.

Aıta ketelik Túrik lırasynyń quny túsip baratyny týraly jazǵan edik.