Túrik kúresinen Qazaqstan qorjynynda úsh kúmis bar

ASTANA. KAZINFORM – Astanada ótip jatqan V Dúnıejúzilik kóshpendiler oıyndarynyń ashyrtmaly aba gıýreshı qorytyndylanyp, marapattaý rásimi ótti. Saıys «Alaý» muz saraıynda uıymdastyryldy.

«Jeńisti qatty sezinip turǵan joqpyn, ekinshi oryn alǵanyma qapalanyp turmyn. Altyn medal alýǵa tolyq múmkindik boldy, degenmen túrik halqynyń kúresi bolǵan soń túrik qarsylasym basym boldy. Shynymdy aıtsam, men qatty daıyndalǵan joqpyn, ashyrtmaly aba gıýreshınen alǵash baq synap turmyn», - dedi ashyrtmaly aba gıýreshı oıyndarynyń kúmis júlde ıegeri Ádilet Ahmetqalı saltanatty marapattaý sátinen keıin agenttik tilshisine suhbat berip.

Onyń aıtýynsha, ashyrtmaly aba gıýreshıniń basqa kúres túrlerinen óz erejesimen erekshelenedi. Sporttyń bul túrinen Túrkııa, Ózbekstan, Qyrǵyzstan jáne Qazaqstan komandasy myqty sanalady.

«Negizi men dzıýdoshymyn, kásibı túrde 10 jyl aınalysyp kelemin. Buıyrsa, álem chempıony bolǵym keledi. Sol jolda eńbektenemin», - deıdi ol.

Aıta keteıik, ashyrtmaly aba gıýreshı – túrik halqynyń ulttyq oıyny. Aqtyq synda úsh otandasymyz júlde aldy.

Ernur Súleımen – kúmis (60 keli);

Ádilet Ahmetǵalı – kúmis (70 keli);

Aıdos Ǵalymov – kúmis (90 keli).

Syıaqyǵa kelsek, І orynǵa 500 myń teńge, ІІ orynǵa 300 myń teńge jáne úshinshi orynǵa 200 myń teńge sertıfıkaty tabystaldy.

Eske sala ketsek, V Dúnıejúzilik kóshpendiler oıyndarynyń ashyrtmaly aba gıýreshıne 19 memleketten 74 sportshy baq synady.