Túrik kompanııasy 5,9 mlrd teńge alǵanymen Qurty-Býrylbaıtal jolyn jóndemeı qoıǵan
ASTANA. KAZINFORM — Ádilet mınıstrligi túrik kompanııasynan 5,9 mıllıard teńge kólemindegi avansty qaıtaryp alý týraly sheshimge qol jetkizdi.
2021 jylǵy 25 qazanda Kólik mınıstrliginiń avtomobıl joldary komıteti «F& A Road Construction» (merdiger) kompanııasymen «Qurty-Býrylbaıtal» avtojolyn jańartýǵa kelisimshart jasady.
Komıtet tehnıkany jumyldyrý jáne materıaldardy daıyndaý úshin 5,9 mıllıard teńge kóleminde avans aýdardy. Alaıda túrik merdigeri jumysqa kirispedi jáne kelisimshart 2022 jyldyń mamyrynda birjaqty buzyldy.
Vedomstvonyń avansty beıbit jolmen qaıtarýǵa tyrysýy nátıje bermedi.
Úkimettiń tapsyrmasy boıynsha Ádilet mınıstrligi merdigerge qarsy tórelik bastap, aqshany qaıtarý úshin belsendi sharalar qabyldady.
2024 jyldyń sáýirinde «White & Case LLP» zań fırmasymen birlesip Parıjdegi Halyqaralyq saýda palatasynyń tórelik sotyna ótinish berildi. Jumystaǵy basymdyq memlekettik qarajatty qaıtarý boldy.
Nátıjesinde 2024 jyldyń maýsymynda merdiger bitimgershilik kelisimge qol qoıýdy usyndy, al 2024 jyldyń 28 tamyzynda avtomobıl joldary komıteti kelisimge qol qoıdy.
Osy kelisimge sáıkes merdiger 2024 jyldyń 26 qyrkúıegine deıin 5,9 mıllıard teńge avanstyq tólemdi qaıtarýǵa, sondaı-aq Ádilet mınıstrliginiń qyzmetteri úshin 280 000 USD jáne tórelik jarnanyń 85 000 USD zańdy shyǵyndaryn óteýge mindettendi.
«Osylaısha Ádilet mınıstrliginiń úılestirýimen tartylǵan memlekettik organdardyń keshendi jumysynyń arqasynda memlekettiń quqyqtaryn qorǵaýǵa, zań keńesshisin tartý shyǵystaryn óteýge, sondaı-aq máseleni qymbat tórelik protseste qaraýǵa jol bermeýge múmkindik týdy. Mindettemesin oryndamaý jáne jol merdigerleriniń avansyn qaıtarmaýyna baılanysty taǵy úsh uqsas áleýetti daý-damaıdy eskere otyryp, bul is memlekettiń óz múddesin qorǵaýdaǵy jáne bıýdjet qarajatyn qaıtarýdaǵy tıimdiligin kórsetedi» deıdi Ádilet mınıstrliginen.
