Túrik kompanııalary Qazaqstanda dári-dármek óndirisi men aýrýhana qurylysyn qolǵa aldy
ASTANA. KAZINFORM — Memleket basshysy otandyq farmatsevtıka ónerkásibi men medıtsına ınfraqurylymyn damytýdy óte mańyzdy baǵyt sanaıtynyn jetkizdi. Bul týraly Aqordanyń baspasóz qyzmeti habarlady.
– Túrkııanyń Abdi İbrahim jáne Nobel sekildi dári-dármek óndiretin iri kompanııalary sheteldegi alǵashqy zaýyttaryn Qazaqstanda ashqan bolatyn. YDA Group Túrkistan jáne Petropavl qalalarynda kópbeıindi aýrýhanalar salyp jatyr. Al Orzax Group kompanııasy Túrkistan oblysynda bıologııalyq belsendi qospalar óndiretin zaýyt salmaqshy. Biz bul bastamalardy tolyq quptaımyz. Elimiz túrik kompanııalarymen tyǵyz jumys isteýge jáne olarǵa qolaıly jaǵdaı jasaýǵa ázir. Osy jobalar Qazaqstannyń aımaqtaǵy dári-dármek óndiretin jáne ony eksporttaıtyn ortalyq retinde qalyptasýyna zor yqpal eteri anyq, – dedi Qasym-Jomart Toqaev.
Prezıdent tsıfrlyq ekonomıkany damytýdy asa mańyzdy mindet retinde atap, jappaı tsıfrlandyrý úderisine aıryqsha kóńil bólýge shaqyrdy.
– Biz ozyq tehnologııalardy túrli salaǵa engizý jumysyna erekshe mán berip otyrmyz. Qazaqstan naǵyz tsıfrlyq el bolý úshin naqty qadamdar jasaýda. Elimizde Jasandy ıntellekt jáne tsıfrlyq damý mınıstrligi quryldy. Biz eki iri sýperkompıýterdi iske qostyq. Astanada Alem.ai halyqaralyq jasandy ıntellekt ortalyǵy ashyldy. Biz elimizdegi orta bilim berý júıesine jasandy ıntellektini engizý úshin aýqymdy sharalardy júzege asyra bastadyq. Osydan eki kún buryn men tıisti Jarlyqqa qol qoıdym. Atap aıtqanda, qazir elimizdiń aldynda bilim berý júıesin árbir oqýshynyń qarym-qabiletine saı beıimdeý, derbes derekterdi qorǵaý, tsıfrlyq ınfraqurylymdy damytý, tehnologııany meńgergen pedagogterdi daıarlaý mindeti tur. Budan bólek, biz Alataý qalasyn kórkeıtýge aıryqsha nazar aýdaryp otyrmyz. Jańa Konstıtýtsııada bul shaharǵa «qarqyndy damıtyn qala» quqyqtyq mártebesi berildi. Bul joba krıptoındýstrııanyń, ınnovatsııa men tehnologııalyq bıznestiń órken jaıýyna zor múmkindik beredi. Sońǵy jyldary túrik bıznesiniń qazaq marketpleısterimen baılanysy nyǵaıa tústi. Mysaly, Kaspikz Hepsiburada kompanııasyn satyp aldy. Freedom Holding Túrkııada tsıfrlyq ekojúıesin quryp, brokerlik qyzmetin jandandyra bastady. Biz túrik kompanııalarymen jasandy ıntellekt, fınteh, kıberqaýipsizdik, onlaın qyzmet salalarynda naqty jobalardy birlese júzege asyrýǵa qashanda daıynbyz, – dedi Memleket basshysy.
Aıta ketelik Qasym-Jomart Toqaev pen Rejep Taııp Erdoǵan Qazaqstan-Túrkııa bıznes forýmyna qatysty.
